ޝިހާބު އިސްތިއުފާދިނުން މާބޮޑަށް ވެސް ލަސްވެއްޖެ!

ގައުމުގެ އާރައީސް ފުރަތަމަ ރިޔާސީ ބަޔާނެއް އިއްވަން ޖެހުނީވެސް އެއްވެސް ގާނޫނީ ހައިސިއްޔަތެއްނެތް މަޖިލީހަކާއެވެ. ޑރ ހަސަނު ބުނިހެން މިމަޖިލީހެކޭ ބޭރުން ގެނެސްފައިތިބި މަޖޫރީނެއްނެކޭ ގާނޫނީ ހައިސިއްޔަތުން ބަލާއިރު މާބޮޑު ތަފާތެއް ނެތެވެ. މިއީ ރައްޔިތުންގެ ކުރިމަތީގައި ރައްޔިތުންގެ މަޖިލީހުގެ ގަދަރުކުޑަވެ، ރައީސުލްޖުމްހޫރިއްޔާގެ އަގު އާއްމުންގެ ކުރިމަތީގައި ވެއްޓިގެން ދިޔަ ކަމެކެވެ. މިހެން ވާން ދިމާވީ އިންތިގާލީ ރައްޔިތުންގެ މަޖިލީހުގެ ރިޔާސަތުގެ ދޯދިޔާކަމުންނެވެ. ގާނޫނު އަސާސީގައި ސާފުބަހުން ކަނޑައެޅިގެން ބުނެފައިވާ އެމަޖިލީހުގެ (އިންތިގާލީ މަރުހަލާގެ ރައްޔިތުންގެ މަޖިލީހުގެ) ޒިންމާތައް ރަނގަޅަށް ނޫފުއްލެވުމުން ވެގެން އުޅޭ ގޯސްތަކެކެވެ.

އިންތިގާލީ މަރުހަލާގެ ރައްޔިތުންގެ މަޖިލީހުގެ އެންމެ ބޮޑު ޒިންމާއަކީ އިންތިގާލީ މަރުހަލާގައި ހަދަންޖެހޭ ގާނޫނުތައް ހަދައި އައު ގާނޫނު އަސާސީގެ ދަށުން ދިވެހިރާއްޖޭގެ އާބާދީ ހަމަހަމަ ގޮތެއްގައި ރަމްޒުކޮށްދޭ، ސިޔާސީ ނުފޫޒުން ސަލާމަތްވެފައިވާ ރައްޔިތުންގެ މަޖިލީހެއް އިންތިހާބުކުރުމެވެ. ނަމަވެސް، ބަޔަކު މީހުން މަޖިލީހުގައި ރައްޔިތުންގެ ލާރިން މުސާރަނަގައިގެން ހުސްއަނގަތަޅައި، ޗުއްޓީނަގައި މަޖާކުރަނީ ގާނޫނު އަސާސީއާ ހިލާފުވުމަކީ އާދައިގެ ކަމެއްގެ ގޮތުގައި ރައްޔިތުންނަށް ދެއްކުމަށް ނޫން ކޮންކަމަކުބާވައެވެ؟ ވެރިކަން ބަދަލުވެގެން ދިޔައިރު، ވަރަށް މުހިއްމު ގާނޫނުތަކެއް އޮތީ ހަދަންޖެހިފައެވެ. އޭގެ ތެރޭގައި މިހާރާއި ކުރީގެ ރައީސުންގެ އިނާޔަތްތަކާއި އިމްތިޔާޒުތައް ކަނޑައެޅުން ހިމެނެއެވެ. މިފަދަ ގާނޫނެއް މަޖިލީހުގެ މެމްބަރުންގެ ފަރުވާކުޑަކަމުން ނުހެދިއޮތީތީވެ އޭގެ ހުރިހާ ދެރައެއް ލިބެމުން އެދަނީ ރައްޔިތުންނަށެވެ.

ރައްޔިތުންގެ މަޖިލީހުގެ ރުހުމެއް ބެލުމެއްނެތި، މަޖިލީހުން ތަނެއް ދެއްކުމުގެ ކުރިން މިހާރުގެ ރައީސް ނަޝީދު އެއޮތީ އަމިއްލައަށް ރިޔާސީ ގަނޑުވަރެއް ހަދާފައެވެ. ކުރީގެ ރައީސް އެގެންދަވަނީ އެބޭފުޅާއަށް ފެންނަގޮތަށް "ކުރީގެ ރައީސްގެ ގަނޑުވަރާއި އޮފީސް" ހިންގަވަމުންނެވެ. ކުރީގެ ރައީސްގެ އޮފީހޭ ބުނަންޖެހުނީ ދައުލަތުގެ ފައިސާއިން މުވައްޒަފުންނަށް މުސާރަދީ، ދައުލަތުގެ ހައިބަތާއި ގަދަރު ރަމްޒުކޮށްދޭ ދައުލަތުގެ ނިޝާންފަދަ ތަކެތި ބޭނުންކުރާތީވެއެވެ. ދެން، ރައްޔިތުންގެ މަޖިލީހުން އެބައިމީހުންގެ ވާޖިބު އަދާކުރެވުނީ ކިހާވަރަކަށްތޯ ވިސްނާލައްވާށެވެ. މަޖިލީހުގެ ރައީސް އިންނެވީ އަވަހާރަފުޅު ލެއްޕިފައިތޯއެވެ؟ މިހާރު ހަދާނަށް އަންނަނީ 10 އަހަރު ވަންދެން ގިނަ ދުވަސްތަކެއްވީ ނަމަވެސް ކުރިއެރުމެއްލިބިފައި ނެތް ޕޯސްޓު އޮފީހުގެ ހުންގާނުގައި ޝިހާބު ހުންނެވި ދުވަސްތަކުގެ ހަދާންތަކެވެ.