އައްޔަންކުރި ކައުންސިލަރުންގެ މަގާމުތައް އުވުނީކަމަށް ކުއްލިގޮތަކަށް ރައީސް އޮފީހުން އިއްޔެ އިއުލާންކޮށްފިއެވެ. މިކަމުގެ އެއްވެސް މައުލޫމާތެއް ކުރިޔަކުން ކައުންސިލަރުންނަށް އަންގާފައެއް ނުވެއެވެ. އެހެންކަމުން އެވެރިން އަދިވެސް ތިބީ މާދަމާ ވަޒީފާއަށް ނުކުންނަގޮތަށޯލައެވެ. މިގޮތުގައި ހުރި އެކަކީ ނ.މާޅެންދޫ ކައުންސިލަރ ޢަދުނާން އިބްރާހިމަށް ލަންދޫއިންފޯ ޑޮޓް ކޮމް އިން ހަބަރުދެއެވެ. އޭނާގެ ވާހަކައަކީ ޕުރެސް ސެކެރެޓަރީ ޒުހޭރު އެވިދާޅުވަނީ ކައުންސިލަރުންގެ މަގާމުތައް އުވާލަން ބޭނުންވާ ވާހަކަކަމަށެވެ. އުވާލީއަކީ ނޫނެވެ. އެހެންތާއޭ ވާނީ ޒުހޭރުވެސް ބުނަން އުޅޭ އެއްޗެއް ހުދު އޭނައަށް ވެސް ނޭގެއެވެ. އެކެއްޗެއް ކިޔަން އުޅެގެން ދެފަހަރު ކިޔެނީ ދެގޮތަށެވެ.
މިސަރުކާރުގެ ހިންގުންތެރިކަން ހުރި މިންވަރަކީ މިއީއެވެ. އެއްވެސް ވަރެއްގެ ރޭވުންތެރިކަމެއް ނެތެވެ. މައުލޫމާތު ފެތުރުމުގައި ގުޅުންތައް ގާއިމުކުރެވި ވިލަރެސް ކުރެވިފައެއް ނެތެވެ. މިފަދަ ބަޔަކަށް ހެޔޮވެރިކަމެއް ކުރެވޭނީ ކިހިނެއްބާއެވެ؟ ހުރިހާ ލަދަކާ ކެއްސެއް އެކައުންސިލަރުންނަށް ނޫންތޯއެވެ؟ އެއްމެ ފަހު ވަގުތާ ޖެހެންދެކަށް ރައީސް އޮފީހުން ބުނަމުން އައީ (ލޯކަލް އިންތިހާބުގެ ގާނޫނާ ހިލާފަށް ނަމަވެސް) ކައުންސިލަރުން މަގާމުގައި ދެމިތިބޭނެ ކަމަށެވެ. މިހާރު މިވީގޮތުން ރަށުގެ ހުރިހާ މީހުން ރޭޑިޔޯ ޓީވީތަކުން ހަބަރު އަޑުއަހައިގެން ގޮސް މަލާމާތްކުރާނީ އެމީހުންނަށް ވިއްޔާއެވެ. ދުރާލައި އެފަދަ އިޝާރާތެއް ކޮށްފައި އޮތްނަމަ، އެހެން ގޮތްތަކެއް ބަލާފައި ބޭއްވުނިސް ތާއެވެ. އެހެން ގައުމުތަކުގައި ކަންކުރަނީ އެއުސޫލުންނެވެ.
އެމްޑީޕީ މެމްބަރުން ކައުންސިލުތަކަށް ހޮވައިގެން ވާނެ ވަކި މޮޅެއް ލިބޭނެ ހެއްޔެވެ؟ މިހާރުވެސް ރަށު އޮފީސްތަކާއި ރައީސް އޮޕީހަކާ ގުޅުމެއް ނެތެވެ. އޭގެ ހެއްކަކީ މިއީއެވެ. ކޮންމެ ޕާޓީއެއްގެ ބަޔަކު އެކައުންސިލުތަކުގައި ތިއްބަސްވާނީ އެވަރެވެ. ތަފާތެއް ހަމައެކަނި ފެންނާނީ ކަމަށް ގާބިލު ހިންގުންތެރި ބަޔަކު ކައުންސިލުތަކަށް ހޮވައިގެންނެވެ. ރައްޓެހިންނާއި، ތިމާގެ މީހުންނާއި، ޕާޓީގެ މީހުންނަށް ވޯޓުލުމުގެ ބަދަލުގައެވެ. އެންމެންނަށް ލާބަލިބޭ ހެޔޮވެރިކަމެއް ކުރެވޭނީ އޭރުންނެވެ. ރަށުގެ ފެންވަރުގައި ކަންތައްތަކަށް ހައްލުހޯދޭނީވެސް އޭރުންނެވެ. ލޯކަލް އިންތިހާބެއްގެ ހަގީގީ ބޭނުމަކީ އެއީއެވެ.
0 comments:
Post a Comment