ހަބަރު ދިރާސާ އަދި ރައީސް ނަޝީދަށް ކުރާ އާދޭސް

1. އަނެއްކާވެސް ބޮޑު ފައުޖެއް ގޮވައިގެން ރައީސް ނަޝީދު އިގިރޭސިވިލާތަށް

މަދުވެގެން 1 ލައްކަ ޑޮލަރު (ނުވަތަ 1 މިލިއަން ދިވެހި ރުފިޔާ) ހަރަދުވާނެކަމަށް ބުނެ ބޮޑު ފައުޖަކައިގެން ރައީސް ނަޝީދުގެ ދެކަބަލުން އިގިރޭސިވިލާތަށް ވަޑައިގެންފިއެވެ. އެފައުޖު ގޮވައިގެން އިޓަލީވިލާތަށް ވަޑައިގަތީ މިދިޔަ ފެބްރުއަރީ މަހުގެ މެދުތެރޭގައެވެ. ވެރިކަމަށް 100 ދުވަސް ވީދުވަހު ހުންނެވީ އިޓަލީވިލާތުގައެވެ. އެތަނުން ބިލަނުން ފައިސާ ލިބޭނެކަމަށް ވިދާޅުވިއިރު، އިޓަލީވިލާތުގެ ސަރުކާރުގެ އިސް ބޭފަޅާ ބައްދަލުކުރެވިފައެއް ނުވެއެވެ. ބޮޑުވަޒީރެއް ނުވަތަ ބޮޑުވަޒީރުގެ ނައިބުގެ ނޫނީ އެފެންވަރުގެ މީހެއްގެ ފައިންފުޅެއްވެސް ނުފެނުނެވެ. ބައްދަލުވީ ރަށެއްގެ މޭޔަރަކާއެވެ. ރާއްޖޭގައި ނަމަ އެއީ ރަށެއްގެ ބޮޑު ކަތީބެކެވެ. މިފަހަރު ކިހާވަރަކުން ދާނެބާވައެވެ؟ ބަލަ، ރައީސް ނަޝީދެވެ. ރާއްޖޭގެ ހަޒާނާއިން ދަރަންޏަށް ލާރިނަގައިގެން ނުވަތަ ފައިސާ ޗާޕުކޮށްގެން ދިޔުމުގެ ބަދަލުގައި ތީތިކޮޅުންވެސް ކޮންމެވެސް ކަމެއް ކުރެވޭތޯ ބަލަމާބަހީއެވެ. ދުނިޔޭގެ އިގުތިސާދު ހީނަރުވެފައި އޮއްވައި އަދި އެވެރިން ލާރި ފޮއްޗެއްނެތިގެން އުޅޭއިރު، ކަލޯމެންނަށް ދޭނީ ވަކި ކޮންއެއްޗެއްހެއްޔެވެ؟ އަނެއްކާ ތިޔަދާ ދަތުރުތަކުގައި ތިޔަދަނީ ރާއްޖޭގެ ބޮޑެތި ވިޔަފާރިވެރިންނަށް ވީއިރު އަދި އެކަމުގެ ހުރިހާ ފައިދާއެއް އޮތީ އެވެރިންނަށްކަމަށްވާއިރު ތިޔަ ދަތުރުތަކުގެ ހަރަދު އެވެރިންގެ އަތުން ނަގާނަމަ މާ އިންސާފުވެރިވާނެ ނޫންހެއްޔެވެ؟

2. ކުރީގެ ބަންޑަރަނައިބު ހަސަން ސައީދު ދެއްވި ލަފާތަކަކީ ގާނޫނީ ގޮތުން އެއްވެސް އޮއްޓަރެއް ހުރި އެއްޗެއް ނޫންކަމުގައި ރައީސް ނަޝީދު ވިދާޅުވެއްޖެ

ވަތަންއެދޭ ގުޅުމުގެ ސިޔާސަތުތަކާ ދެކޮޅަށް އަދި ވައުދުވެ ވަޑައިގެންނެވި ހެޔޮވެރިކަމުގެ ވިސްނުމުން ބޭރުވެވަޑައިގެން ރައީސް ނަޝީދު ކުރައްވަމުން ގެންދަވާ ކަންތައްތަކަށް ހަސަނު ފާޑުކިޔުމުން ހަސަން ދެއްވި ލަފާތަކަކީ ގާނޫނީގޮތުން އެއްވެސް ބުރަދަނެއް ހުރި އެއްވެސް ނޫންކަމަށާއި ސިޔާސީ ބޭނުމެއްގައި ކުރެއްވި ކަންތައްތަކެއް ކަމަށް ރައީސް ނަޝީދު ދާދި ފަހުން ވިދާޅުވެއްޖެއެވެ. އަދި ތިމަންގެ ބަންޑާރަ ނައިބަކާއި ރައީސް އޮފީހުގައި ގާނޫނީ ޑިޕާޓުމަންޓެއް އޮންނަކަމަށް ވިދާޅުވެއްޖެއެވެ. ބަލަ، ރައީސް ނަޝީދެވެ. ދިޔާނާ ސައީދު ދެއްވާ ގާނޫނީ ލަފާއަށް މަނިކުފާނަށް އެބަ އަމަލުކުރެއްވޭތޯއެވެ. ދެންއޮތީ ރައީސް އޮފީހުގެ ގާނޫނީ ބައިގެ ބޮޑަކަށްހުރި ޑރ މުނައްވަރުގެ ވިޔަފާރީގެ ބައިވެރިޔާ ހިސާން ހުސެންގެ ގާނޫނީ ލަފާފުޅެވެ. ބަލަ އެކަމަނާ ނުދޭ ގާނޫނީ ލަފާތަކެއް ދިންކަމަށްވެގެން މަނިކުފާނުގެ އަގަފުޅު ޖުހާ ޒުހައިރު ނޫސްވެރިންނަށް ކިޔައިނުދޭހެއްޔެވެ؟ އަހަރެމެން ވަކި ހަސަނު މާރަގަޅު މީހަކަށް ހަދަނީ އެއްނޫނެވެ. ނަމަވެސް، ހަސަނެއް އަހައްމަދެއް ނަޝީދެއް ކަމަކު ހެޔޮބަހެއް ބުނެފިޔަ ހެޔޮބަހެއްވާނީ ހެޔޮބަހަކަށެވެ. ކޮންމެހެން އެއީ ގާނޫނީ ބުރަދަނެއް ހުރި އެއްޗެއްތޯ ނެތް އެއްޗެއްތޯ ބެލުމުގެ ބޭނުމެއްނެތެވެ. ތިމަން އެކުލަވާލާނީ ކުޑަ ސަރުކާރެކޭ ބުނެ ވެރިކަމަށް އިސްވެ 3 މަސް ނުވަނީސް 400 އަށްވުރެ ގިނަ ސިޔާސީ މަގާމުލައިގެން އުޅުނީމާ އެވީ ބޮޑު ސަރުކާރަކަށެވެ. ވަތަންއެދޭ ގޮތަށް އެންމެން އެކުވެރިވެގެން މިގައުމަށް ހެޔޮބަދަލެއް ނެގެސްދޭނަމޭ ކިޔާފައި މާބޮޑަށް އެމްޑީޕީވެފައި ދެންތިބި މީހުންގެ މަތިން ހަދާންނެތިކޮށް ހަމައެކަނި އެމްޑީޕީ މީހުންގެ ކަންތައްތަކާމެދު އުޅުމުން އެވީ ކޮންއެއްޗަކަށްތޯއެވެ؟ ބަލަ ތިޔައީ އެމްޑީޕީގެ ކޮން ހައިސިއްޔަތެއް އޮތް މީހެއްތޯ ބުނެދި ބަލާށެވެ. މިހާރު ތިޔައީ އެމްޑީޕީގެ ރައީސެއްވެސް ނޫނެވެ. ޗެއާޕާސަނެއްވެސް ނޫނެވެ. ހަމަ އަހަރެމެން ކަހަލަ ދެރަވަރުގެ މެމްބަރެކެވެ. ހަގީގަތް އޮޅުވާނުލައްވާށެވެ. ރިޔާސީ އިންތިހާބުގެ ފުރަތަމަ ބުރުގައި އެމްޑީޕީ އިންތިހާދުން ނެރުނު މުހައްމަދު ނަޝީދުވަނީ އެބުރުގައި ނާކާމިޔާބުވެފައެވެ. ކާމިޔާބު ވެފައިވަނީ ވަތަންއެދޭ ގުޅުމުގެ ކެޑިޑޭޓެވެ.

3. ނ. އަތޮޅުގެ ކުރީގެ އަތޮޅުވެރިޔާ ފަރުހަތު އަލީ އިލެކްސަން ކޮމިސަނުން ނަން އަބުރާ ގެނައުމާއެކު ސްޓޭޓު މިނިސްޓަރުކަމަށް

މިއަދުގެ ވަގުތެއްގައި ނ. އަތޮޅުގެ ކުރީގެ އަތޮޅުވެރިޔާ ފަރުހަތު އަލީ އަށް މިނިސްޓަރ އޮފް ސްޓޭޓު ފޯ ހޯމްއެފެއާޒުގެ ނައިބުކަމަށް އައްޔަންކުރައްވައިފިއެވެ. މިކަމެއް މިހިގީ އދ އަތޮޅުގެ މަހިބަދޫގެ ދާއިރާއަށް ކުރިމަތިލައްވާ ފަހުވަގުތު ނަން އަބުރާ ގެންދެވިތާ މަދު ދުވަސްކޮޅެއްގެ ތެރޭގައެވެ. އަނެއްކާ، ދައުލަތުގެ މަގާމެއް ދީފައި ރައީސް ނަޝީދު މީނާ ގަނެލީބާވައެވެ؟ މީނާގެ މަޒީއަށް ޖެހިލާއިރު، އޭނާވަނީ ނ. އަތޮޅުގެ އަތޮޅުވެރިކަމުގައި އެރަށުގެ ރަށްރަށުގެ ރަށު އޮފީސްތަކަށް ބިލުހަދައި ރައްޓެހިންނަށް އެންމެ އަގުބޮޑު ފަހުގެ ފޯނުފަދަ ތަކެތި ގަނެދީފައިކަމަށް ފަޅާއަރާފައެވެ. އަދި މީނާވަނީ ޔާމީނަށް ސިޔާސީ ޕާޓީއެއް ހަދައިދިނުމަށް އެހީތެރިވެދީ ޕާޓީ ހިންގައިދީފައެވެ. މިއީ ކުރީގެ ވެރިކަމުގައި ފޮނިބޮއިފައި ރަހަ ގެއްލުމުން އިނަރ މޯލްޑިވްސް ފިރާގެކޭ އެއްފަދައިން ކޮޅު ބަދަލުކޮށްލި މީހުން ތެރެއިން އެކަކެވެ. ބަލަ މިއީ މައޫމޫނުގެ ވެރިކަން ދެމެހެއްޓޭތޯ ޖާނާއި މާލުން ގުރުބާންވީ މީހުންނެވެ. ބަލަ ނަޝީދެވެ. މައުމޫނަށް ވެސް ސަރުކާރުގެ ބޮޑުންނަށް ލާން ފެނުނީ މިކަހަލަ މީހުންނެވެ. މިހާރު މަނިކުފާނުވެސް ތޯއެވެ؟ ލަދުން ބޯ ހަލާކުވާވަރު ވެއްޖެއެވެ. މަނިކުފާނު ވެރިކަމަށް ގެނައުމަށް މަސައްކަތްކުރެވުނީތީ ލަދުގަންނަން ޖެހިއްޖެއެވެ.

4. ކުށްވެރިން ރުއްސައި، އަންނަ އިންތިހާބުގެ ބޭނުމުގައި ފުލުހުންގެ ތެރޭގައި ގާނޫނާ ހިލާފަށް ކަންތައްތަކެއް ކުރާކަމުގެ ތުހުމަތު ރައީސް ނަޝީދު އަޅުއްވައިފި

ތަހުގީގަށް ޖަލުގައި ބަންދުކޮށްފައި ތިބޭމީހުންނަށް އަނިޔާކުރާ ކަމުގެ ޝަކުވާތަކާއި ފުލުހުންގެ އިދާރާގެ ތެރޭގައި ގާނޫނާ ހިލާފު އަމަލުތަކެއް ހިންގަމުންދާކަމަށް ބުނާ ޝަކުވާތައް ބެލުމަށް ރައީސް ނަޝީދު ރިޔާސީ ކޮމިޝަނެއް އެކުލަވާލެއްވިއިރު، އެފަދަ ޝަކުވާތަކެއް ގާނޫނު އަސާސީއިން އުފެއްދި ޕޮލިސް އިންޓަގިރިޓީ ކޮމިޝަނަށް ވެސް އަދި ފުލުހުންގެ އިދާރަށް ވެސް ލިބިފައިވާ ކަމަށް ނުވެއެވެ. މިފަދަ ބޮޑު ތުހުމަތެއް ކުރާއިރު އެކަމުގެ ތަފުސީލު އާއްމުންނަށާއި ދައުލަތުގެ ކަމާބެހޭ މުއައްސަސާތަކަށް އެގުމަކީ ވަރަށް މުހިއްމުކަމެކެވެ. އެވަރު ނޭގޭ މީހުން ތަންމަތި ހިފައިގެން ގެއަށް ދިޔުމަށް އަދަބުވެރިކާއެކު އިލްތިމާސްކުރަމެވެ. މިކޮމިސަނުގައި ހިމެނެނީ 3 މިނިސްޓަރުންނާއި ރައީސް އޮފީހުގައި މަސައްކަތްކުރާ 2 ގާނޫނީވަކީލެކެވެ. މީގެ ތެރޭގައި ހިމެނޭ ހިސާން ހުސެން އަކީ ރައީސް އޮފީހުގެ ގާނޫނީ ބައިގެ ވެރިޔާއެވެ. މީނާއަކީ އުތުރު ޕްރޮވިންސެއްގެ ސްޓޭޓް މިނިސްޓަރެއްކަމަށްވާ ހަމައެކަނި ކައިވެންޏަށްޓަކައި ބަފައިބެ ރުއްސާލުމަށްޓަކައި އިސްލާމުވި އެމެރިކާގެ ފަރަންޖީއަކާ އިދެގެން މިއޮތްހައި ދުވަހު އެމެރިކާގައި އުޅުނު ތިލްމީޒާގެ ކޮއްކޮއެވެ. ބަލަ ރައީސް ނަޝީދެވެ. ތިޔައީ ކޮން ސަކަރާތެއް ހެއްޔެވެ. ފުލުހުންގެ ތެރޭގައި ކަމެއް ގޯސްކޮށް އުޅެންޏާމު އެކަން ބަލާނެ ކޮމިޝަނެއް ގާނޫނު އަސާސީގައި ބުނެފައި ނެތީހެއްޔެވެ؟ އެވެރިން އެކަން ކުރިޔަ ދޭށެވެ. ބަޔަކު މީހުންނަށް އެލަވަންސެއް ދެންޏާމު މަނިކުފާނަށް ލިބިލައްވާ 1 ލައްކަ ރުފިޔާގެ މުސާރައިން ހަމަ ޖައްސައިލަދޭށެވެ. ޑްރާމެއް ކުޅުއްވަންޏާމު ޔޫސޭ ގާތު ބުނެލަނިކޮށް އެކަން ކޮއްލަދީފާނެވެ.