މާރިޔާއަށްޓަކައި ގުރުބާންވާން އަންނި ހުރީ ތައްޔާރުގައި - ތަސްމީނު ބަސްމަދުވެފައި!

މާލޭގައި ހުރި ސިޓީހޮޓާތައް	ކޮޓަރީގެ އަދަދު
ކެންޑިސް ހޮޓެލް	17
ސެންޓުރަލް ހޮޓެލް	41
ހޮލިޑޭއިން	117
ހޮޓެލް ފެރެސްކޯ	38
ކާމް ހޮޓެލް	12
މޫކައި ހޮޓެލް	51
މޫކައި ސުއިޓު	52
ނަލަހިޔާ ހޮޓެލް	42
ރިލެކްސް އިން	41
ސުކައި ހޮޓެލް	15
ނަސަންދުރަ ޕެލަސް ހޮޓެލް	31
މާބުލް ހޮޓެލް	20
ބާނި ހޮޓެލް	17

މިޖެހިގެން އުޅެނީ ވަރުގަދަ ކަމަކާއެވެ. އެމްޑީޕީގެ އާއްމު މެމްބަރުން ހިތްހަމަނުޖެހި، ނުރުހުން ފާޅުކުރަނީއެވެ. ތަފާތު ޕުލެޓުފޯމުތަކުގައި ހަޅޭއްލަވަނީއެވެ. ޕާޓީގެ މަސްލަހަތު ގެއްލިދަނީއެވެ. ސަރުކާރުގެ ކޯލިސަންގެ ބައިވެރިން ރުޅިމޫނު ހަދައި، ސަރުކާރު ވައްޓާލުމަށް ތައްޔާރުވަނީއެވެ. އިންޒާރުތައް ދެނީއެވެ. ސަރުކާރުގެ ބޭރުންނާއި އެތެރެއިން ޕުރެސަރުކުރަނީއެވެ. ނަމަވެސް، ބަގުރާގެ ގަވާއިދު ބާތިލުކޮށް ރައްޔިތުންގެ ކިބައިން މާފަށް އެދޭކަށް ރައީސް ނަޝީދު ބޭނުމެއް ނުވެއެވެ. ޕާޓީގެ އެއްބައިވަންތަކަން ގެއްލި، މެމްބަރުންކޮޅު ގެއްލި، ޕާޓީ ހީނަރުވިޔަސް އެންމެ ރަގަޅެވެ. ސަރުކާރު ވެއްޓި، ތައްމަތި ހިފައިގެން ގެޔަށްދާންޖެހުނަސް އެންމެ ރަގަޅެވެ. މާރިޔާ (ހޮލިޑޭއިން) ގުރުބާންކުރެވޭކަށް ނެތެވެ. މިއަދު ރައީސް ނަސީދު ދިން ތަގުރީރުން މާނަކުރެވެނީ މިހެން އެކަންޏެވެ. ޕާޓީގެ މަސްލަހަތަށްވުރެ، މާރިޔާ މުހިއްމުވީ ކީއްވެބާވައެވެ؟

ބަގުރާގެ ގަވާއިދަކީ ހޮލިޑޭއިންއަށްޓަކައި ހަދައިދީފައިވާ އެއްޗެއްކަން ނޭގޭ މީހަކު މިހާރު މިމާލެއަކު ނޫޅޭނެއެވެ. އެގަވާއިދުގައި އެބުނާ 100 އަށްވުރެ ގިނަ ކޮޓަރި މާލޭގައި ހުރި ހަމައެކަނި ހޮޓަލަކީ އެތަނެވެ. އެތަނުގައި ޖުމުލަ 117 ކޮޓަރި އެބަހުއްޓެވެ. ދެން އެންމެ ގާތުންވާދަކުރާ ސިޓީ ހޮޓާތަކުގައިވެސް ހުރީ 52 އަދި 53 ކޮޓަރިއެވެ.

އެގަވާއިދުގައި 117 ކޮޓަރިއޭ ޖެހިނަމަ، ތަންކޮޅެއް އޮޅުން ކުޑަވީސްކަންނޭގެއެވެ. ފަހަރުގައި 100 ކޮޓަރިއޭ ލިޔުމުން، މޫކައި ހޮޓަލާއި ސުއިޓު އެއްކޮށްލައިގެން އެއް ހޮޓަލެއްގެ ގޮތުގައި ބަލައި އެތަނަށްވެސް ބަގުރާ ގެންގުޅުމުގެ ހުއްދަލިބިދާނެ ކަންނޭގެއެވެ. ނޫނީ، މިފަހަރު ކޮޓަރީގެ އަދަދު ބޮޑުކޮށް އޮތަސް، ސިއްރުސިއްރުން އެހެން މީހުންނަށް ނޭގޭގޮތަށް ގަވާއިދު އިސްލާހުކޮށްލައި، ކޮޓަރީގެ އަދަދު މަދުކޮށްލާނީ ކަންނޭގެއެވެ. 20 ކޮޓަރިޔަށް ހަދާލަނިކޮށް ސުޓޭޓު މިނިސްޓަރު އާދިލަށްވެސް ކޮޓަރީގައި އޮވެގެން އެއްވެސް ދައްޗަކާ ނުލައި އެކަންވެދާނެތާއެވެ.

އަންނި މިތަރުކޭހެއް ކުޅޭއިރު، ބުރުމާ ގާސިމާއި ޑރ ހަސަނާއި ތަސްނީމާއި ޔާމީނާއި ސިޔާސީ ޕާޓީތައް (އަދާލަތު ފިޔަވައި) ތިބީ ނިދިތާއްޔާޖެހިފައިބާވައެވެ؟ ނޫސްބަޔާނެއް ނުވަތަ ނޫސް ކޮންފަރެންސެއް ނުވަތަ މަޖިލީހަށް ކުއްލި ގަރާރެއް ލާނެ މީހަކުވެސް ނެތީހެއްޔެވެ؟ މިވެރިންވެސް މާލެއިން އެތިފޮދެއް ބޯލެވޭނެކަމުގެ އިންތިޒާރުގައި ތިބީ ބާވައެވެ؟

މިގަވާއިދަކީ ކުރިން މާލޭގައި އުޅޭ ބިދޭސީންނަށް ވަކިވަކިން ދީފައިވާ ހުއްދައިގެ ބަދަލުގައި އެމީހުންނަށް ދޭ އެއްޗެކޯލައެވެ. އެއިރުން، މާލެ ތެރޭގައި ބަގުރާ ގެންގުޅޭލެއް މަދުވާނެކަމަށް ސުޓޭޓު މިނިސްޓަރު އާދިލް ބުންޏޯލައެވެ. އެވަރަކުން އެބަގުރަލެއް އެވެރިން ބޯންދޭން އާދިލުމެން ބޭނުންވަނީ ކޮންސަބަބަކާހުރެހެއްޔެވެ؟ ހޮލިޑޭއިން މެދުވެރިކޮށް އެވެރިންނަށް އަގުބޮޑުކޮށް އެބައިވަރު ވިއްކައިގެން މާރިޔާގެ ސަޓޯގެ ޖީބު ބޮޑުކޮށްދިނުން ހެއްޔެވެ؟ ނޫނީ، އެވެރިން އެއެއް ބޮއިގެން، މާލޭގެ މަގުތަކުގައި ކާލިކެޑޭތަން ބަލަންބޭނުންވާތީ ހެއްޔެވެ؟ ނޫނޭވާ؛ އެހާ ސިއްހަތަށް ފައިދާހުރި، މީރު ބުއިމަކުން ބަޔަކު މީހުން މަހުރޫމު ކުރަން ހެޔޮވާނެ ހެއްޔެވެ؟ ބަލަ، މިނިސްޓަރު ރަޝީދުއާއެވެ. ބަގުރާ ހުއްދަކޮށްގެން އުޅޭ ގައުމުތަކުގެ ވެރިން އެއުޅެނީ އޭގެ ބަލާވެރިކަމުން މިންޖުވާނެގޮތެއް ނޭގިގެންކަން އެގޭހެއްޔެވެ؟ އެއްފަހަރު ބުނާނެ ބޮއިގެން ހުރެ ކާރެއް ނުދުއްވޭނެއޭ. އަނެއް ފަހަރު ބުނާނެ ބޯ އުމުރު މަތި ކުރާނީއޭ. އަނެއް ފަހަރު ބުނާނެ މާބަޑު އަންހެނުންނާއި ޒުވާން ފުރައިގެ ކުދިންނާއި މުސްކުޅިން އެނުބޯށޯ.