ޔާމީނު ސަރުކާރަށް ގޮން ޖަހައިފި!

މިދާކަށް ދުވަހު އިންޑިޔާގެ ނޫހެއްގައި މިވަނީ ޔާމީނު އެސްޓީއޯ ސިންގަޕޫރު އޮފީސް މެދުވެރިކޮށް ސިއްރިޔާތުގައި ބަރުމާއަށް ތެޔޮ ވިއްކައިގެން އަމިއްލަ ފައިދާތަކެއް ނެގި ވާހަކަ ފެންމަތިވެފައެވެ. 800 މިލިއަން ޑޮލަރުގެ ފައިދާއެއް ނެގިކަމުގެ ތުހުމަތު ކޮށްފައިވެއެވެ. އެފައިސާ އެސްޓީޔޯއަށް ނުވަންނަ ކަމަށާއި އެވިޔަފާރިކުރީ ސިއްރިޔާތުގައި ޖޮއިންޓު ވެންޗަރު ކުންފުންޏެއް ހަދައިގެން ކަމަށް ވެއެވެ. މިކަމާގުޅިގެން ޔާމީނާ ސުވާލުކުރުމުން ވިދާޅުވީ އެފަދަ ޖޮއިންޓު ވެންޗަރު ކުންފުންޏެއް އޭރު އޮތް ކަމަށާއި ނަމަވެސް އެއިން ލިބުނު ފައިސާއަށް ވީގޮތެއް ނޭގޭކަމަށެވެ. އަދި އިތުރަށް ވިދާޅުވީ ތިމަންނަގެ ކޮރަޕްސަނުގެ އަމަލެއް ނޯންނާނެކަމަށާއި މިސަރުކާރަކަށް އެފަދަ ކަމެއް ނުހޯދޭނެކަމަށެވެ.

ޔާމީނަކީ މިދިޔަ ސަރުކާރުގައި އެތަކެއް ވަޒީރު މަގާމުތަކެއްގެ އިތުރުން ސަރުކާރުގެ އެތަކެއް ބޮޑެތި ކުންފުނިތަކެއް ހިންގެވި ވެރިއެކެވެ. އަދި ކޮރަޕްސަނާ ގުޅުވައިގެން އެންމެ ގަދަޔަށް ވާހަކަ ދައްކަވާ އެއް ބޭފުޅާއެވެ. ނަމަވެސް، އަންނިގެ ސަރުކާރުން ނުވަތަ އެމްޑީޕީ މީހުން ކުރިން ކިޔަމުން އައި ލަވަ ފަރިއްސަށް ބަދަލުވެ، ޔާމީނާ ގުޅުވައިގެން ދެކެވުނު ކަރަޕްސަނުގެ އެއްވެސް އަމަލެއް މިހާ ދުވަސްވީއިރުވެސް ސާބިތު ނުކުރެވުނީ ކީއްވެތޯ މިއަދު ބަޔަކު މީހުން ސުވާލުކޮށްފާނެއެވެ. މިކަމުގެ ހަގީގަތް ހޯދުމަށް ކޮނުނު ވަރަކަށް ސާބިތުވަނީ ދެކަމެކެވެ. އެއްކަމަކީ މިސަރުކާރު ނާގާބިލުކަމެކެވެ. ދެވަނަ ކަމަކީ، އެފަދަ ކޮރަޕްސަންތަކާއި މިސަރުކާރުގެ ވެރިންނާ ގުޅިފައިވާ ވަރުގަދަ ގުޅުމެވެ.

އެސްޓީއޯ ސިންގަޕޫރުގެ ކޮރަޕްސަން:

އެސްޓީއޯ ސިންގަޕޫރު އޮފީހުން ހިންގާފައި ހުރި ކޮރަޕްސަންގެ ބައްޕައަކީ އެއޮފީހުގެ މެނޭޖިން ޑިރެކްޓަރު މުނީޒުއެވެ. އޭރުވެސް މިހާރުވެސް އެސްޓީއޯ ސިންގަޕޫރު އޮފީސް ހިންގަން އެހުރީ މުނީޒެވެ. އެސްޓީޔޯގެ ޑިރެކްޓަރުންގެ ބޯޑުން ފާސްނުކޮށް އުފައްދާފައިވާ އެބުނާ ޖޮއިންޓު ވެންޗާ ކުންފުނީގެ ހިއްސާދާރަކީވެސް އަދި މެނޭޖިން ޑިރެކްޓަރަކީ ވެސް މުނީޒެވެ. ދެން އޭރު އެމްޑީ މަނިކާއި ޔާމީނުގެ ފަރާތުން އެސްޓީޔޯގެ މަތީމަގާމެއްގައި ތިބި ދެއަންހެން މުވައްޒަފުންނެވެ. އެދެވެރިންނަށް ބައި އަޅާގޮތަށް ނަމެއްގައި ތިބި ބަޔެއްގެ ގޮތުގައެވެ.

މުނީޒަކީ ޔާމީނުގެ އެއް އަތެވެ. ޔާމީނުގެ ހުރިހާ ކޮރަޕްސަނެއް އޭނާ ފަސްއަޅައިދެއެވެ. ޔާމީނު ސިންގަރޫޕަށް ގޮސްފިއްޔާމު މެހެމާންދާރީ އަދާކުރުމުގައި އެވަރެއް ނެތެވެ. މުނީޒު ވަޒީފާއިން ވަކި ކުރާނެހާ ހިތްވަރެއް އަންނި ސަރުކާރަކު ނެތެވެ. މުނީޒަކީ އެސްޓީޔޯގެ ޗެއާމަން ސޯރޭ މާ އިތުބާރު ކުރާ މިހެކޯލައެވެ. ބުނާއިރަކު ވަގުތުން މެލޭސިޔާގައި ހުންނަ ސޯރޭގެ އަބިގޮއްޔެ ބޭނުން ވަރަކަށް ފައިސާ ފޮނުވާލަދެޔޯލައެވެ. ސިންގަޕޫރު ސޮޓޮކް އެކުސްޗޭންޖުގައި ސޯރޭ ގަނެގެން އުޅޭ ޝެއާތައްވެސް ބަލަހައްޓަނީ މިކަލޭގެއެވެ. މިހާރު މިއީ ސޯރޭގެވެސް ބޯއީ އެކެވެ. ނުކިޔަވާ ތިބޭކަމަކުން މިފަދަ މީހުންގެ ބޭނުން ޖެހެނީ މާބޮޑަށެވެ. މުނީޒުމެން އެއްފަރާތް ކުރެވެން ހަމަ ނެތީއެވެ. މިހާރު އަނެއްކާ މިމުނީޒަކީ ސީދާ މުލިއާގޭގެ އޯޑަރަށް ތަކެތި ސިންގަޕޫރުން ފޮނުވައިދޭ މީހެކޯލައެވެ. އެންމެ ފަހުން، އެސްޓީއޯ ސިންގަޕޫރު އޮފީހުން ސޯރޭ ވަކިކޮށް މިހާރު އެތަން ހަވާލުކޮށްފައި މިހާރު ހުރީ ކެބިނެޓު ސެކެރަޓަރީ ކޮށީގޭ އަބްދުއްލޯ ސައީދުއާއެވެ. ސައީދުގެ ޖީބު ތަނަވަސްކޮށްލަދިނީއެވެ.

ބޭރުގެ އިންވެސްޓުމަންޓުތަކުން ކަޓުނެގުން:

ރާއްޖޭގައި އިންވެސްޓުކުރަން އަންނަ ބޭރުގެ މަހުޖަނުން އަތުން ޔާމީނު ޓުރޭޑުގައި ހުރެގެން ކަޓުނަގާ ވާހަކައަކީ އަންނިމެން އޭރު ދައްކާ އުޅުނު ބޮޑު ވާހަކައެކެވެ. އޭރު އެތަނުން ކުރި ވައްކަންތަކުގެ ވާހަކަ މިހާރު ދެއްކެން ނެތީ ކެރަފާ ނަސީމުގެ ސަބަބުންނެވެ. ކެރަފާ ނަސީމަކީ އެތަނުން ޔާމީނަށް ކަޓު ނަގައިދޭން ހުންނަ ބޮޑުމީހާއެވެ. ޔާމީނު ކުއްވެރިކުރަން ވެއްޖެނަމަ ފަލީހަތްވާނީ ނަސީމެވެ. ޔާމީނު ކަންތައް ކޮށްފައި ހުރީ ނަސީމު ނިވާފަތް ގަނޑަކަށް ހަދައިގެންނެވެ. މިއަދު ނަސީމަކީ މިސަރުކާރުގެ ބޮޑެއްކަމުން މިކޮރަޕްސަނުގެ ވާހަކަ ދެއްކޭކަށް އަންނި އަކަށް ނެތެވެ. އެކަން ބަލަން ވެއްޖެޔާމު މާރިޔާދީދީމެންގޭ ކުދިން ބޭރު ބަޔަކު ވާވައްދައިގެން މެގަމޯލުޑިވުސް އުފެއްދިގޮތްވެސް އޮތީ ބަލަންޖެހިފައެވެ. އަންނީގެ އަނގާގައި އޮތީ މަލަން އެޅިފައެވެ. މާރިޔާއަށް ޓަކައި ކޮންމެ ފަދަ ކަމެއްވެސް އަންނި ކޮށްފާނެކަން ނޭގޭ މީހަކު މިހާރު އެމްޑީޕީގައި މަދުވާނެއެވެ.

މިގޮތަށް ގޮސް ކިޔާނެކަމެއް ނެތެވެ. ޔާމީނުގެ ކޮރަޕްސަންގެ ވާހަކަތަކާއި މިސަރުކާރުގެ ބޮޑުންނާ ގުޅިފައި ހުރީ މާވަރަކަށެވެ. އެއް އަތަށް ޖެހިލާއިރު އަންނީގެ އެކުވެރި ކޮއްޓި ސައީދެވެ. ނޫނީ ތިމާގެ ނަސީމެވެ. ނޫނީ އެންޑީޕީއަށް މެމްބަރުން ގަނެދޭ ޖާބިރެވެ. ކުރީގެ އެމްޑީ މަނިކަކީވެސް މިސާރުކާރުގެ ބޮޑެކެވެ. ޕެންސަން ސުކީމު ބަލަހައްޓަނީ މީނާއެވެ. ޔާމީނު މަތިހަށި ނަގައިގެން މިސަރުކާރާ ދިމާއަށް ބޭނުން އެއްޗެއް އެބުނެލަނީ ބުނެލެވެން އޮތީމައެވެ. ކުރެވޭނެ އެއް ކަމެއްވެސް ނޯންނާނެއެވެ. ބޮޑުވަރަކަށް ވާނެކަމަކީ ދެއުޅިއެއްނުވާ ދައުވާއެއް ކޯޓުގައި ކޮށްލުމެވެ. ސާބިތުކޮށްދެވޭ ވަރަށް އާރުލާ އެއްޗެއް ބުނެލެވޭކަށް ނޯންނާނެއެވެ.