މަހުލޫފު ރައްޔިތުންގެ މަޖިލީހަށް ހުށައަޅައިގެން އުޅޭ މައްސަލައަކީ ޒާތީ މައްސަލައެއް!

މަހުލޫފު ރައްޔިތުންގެ މަޖިލީހަށް ހުށައަޅައިގެން އުޅޭ މައްސަލައަކީ ޒާތީ މައްސަލައެއް!

މިއަދުގެ ވަގުތެއްގައި ގަލޮޅު ދެކުނު ދާއިރާގެ މެމްބަރު އަހުމަދު މަހުލޫފު ރައްޔިތުންގެ މަޖިލީހަށް ކުއްލި މައްސަލައެއްގެ ގޮތުގައި ހުށައަޅައިގެން އުޅޭ މައްސަލައަކީ ޒާތީ މައްސަލައެއްގެ ގޮތުގައި ބަލާނެ ޖާގަ ވަރަށް ބޮޑެވެ. ސަބަބަކީ

(ހ) ޑީއާރުޕީ އާއި ޕީއޭގެ ރޭވުމަކުން ހުސްނު ސުއޫދު ބަންޑާރަ ނައިބުކަމަށް އައްޔަންކުރިޔަ ނުދޭން ކުޅަ ކެހިވެރި މަސައްކަތް އެމީހުން ހީކުރި ގޮތާ ހިލާފަށް ފަނުފުލުން ދިޔުމާއި އެފަދަ ދެވަނަ ފުރުސަތަކަށް ބޭނުންވެފައި ތިބުން

(ށ) ކޯޓުތަކުގައި މައްސަލަތައް ކުރިއަށް ނުގޮސް މަޑުޖެހިފައި ހުންނަ ވާހަކައަކީ ރާއްޖޭގެ އެންމެން ދައްކާ ބާވާހަކައަކަށްވެފައި އޮއްވައިމެ، އެވާހަކަ ބަންޑާރަ ނައިބު ބުނެލައިގެން މާ މުހިއްމު ބޮޑު މައްސަލައަކަށް އިދިކޮޅު ޕާޓީގެ މެމްބަރަކަށް ވުން. ހާއްސަކޮށް، ރައްޔިތުންނާ ގުޅޭ މުހިއްމު އެތަކެއް މުހިއްމު ކަންތައްތަކާއި މައްސަލަތަކަކަށް ހައްލު ހޯދަން މަސައްކަތްކުރަންޖެހިފައި އޮއްވާމެ މިކަހަލަ ތާކުންތާކު ނުޖެހޭ އެންމެ މީހެއްގެ މައްސަލައެއް ނަގައިގެން އުޅުން.

(ނ) ރިޔާސީ ނިޒާމެއްގައި ސަރުކާރާއި ކޯޓުތަކަކީ ވަކިވެފައިވާ 2 ބާރުކަމަށްވެފައި، ކޯޓުތަކުން މައްސަލަ ކުރިއަށް ނުގެންގޮސް މަޑުޖައްސާކަމަށްވެއްޖެޔާމު އެކަމާ ވާހަކަދައްކާ ފިޔަވަޅު އެޅުމަކީ (ޗެކްސް އެންޑް ބެލެންސްގެ ވިސްނުމުގައި) ދެން ތިބި ދެބާރު ކަމަށްވާ ސަރުކާރާއި ރައްޔިތުންގެ މަޖިލީހުގެ ޒިންމާއެއްކަމަށްވެފައި، ކޯޓުތަކުގައި ހުރި މައްސަލަތައް އަވަސްކުރުމަށް ކޯޓުތަކަށް ސަރުކާރުގެ ފަރާތުން ބަންޑާރަނައިބު ބާރުއެޅުމަކީ ސަރުކާރުގެ ދުސްތޫރީ ޒިންމާއަކަށްވުން.

(ރ) ރައީސް އޮފީހުގެ މުވައްޒަފަކާ ގުޅޭ ބަދުއަހުލާގީ މައްސަލައެއް ކޯޓުން ނުބަލާ ދިގު ދަންމަމުން ގެންދާތާ މަސްތަކެއްވެފައިވާކަން ޕްރޮސިޔުޓަ ޖެނެރަލު ވިދާޅުވީއިރު އެއީ ކޯޓުގެ ކަރާމާތް ނަގާލި ވާހަކައަކަށް ނުވެފައި އެފަދަ އެހެން މައްސަލައެއް، ހާއްސަކޮށް އެތަކެއް އައްޑޫ ރައްޔިތުންގެ މަސްލަހަތު ހިމެނޭކަމެއްގައި ކޯޓުތަކުން އެގޮތަށް އަމަލުކުރަމުންދާތީ އެކަމާ އެއްޗެކޭ ބުނުމަކީ މާބޮޑުކަމަކަށް ހަދައިގެން އުޅުން.

ބަލަ، މަހުލޫފެވެ، ކޯޓުތަކުގައި މައްސަލަތައް ފުނިޖެހި އެތައް ބަޔެއްގެ ހައްގުގެއްލިވާއިރުވެސް، އަނގައިން ނުބުނެ ތިބެންވީހެއްޔެވެ؟ ކޯޓެއްކަމަކު، ބަންޑާރަ ނައިބެއްކަމަކު، ނޫނީ އުއްތަމަ ފަޑިޔާރެއްކަމަކު، އެބަޔަކާ ހަވާލުވެފައިވާ މަސްއޫލިއްޔަތު ރަނގަޅަށް ނުއުފުއްލާކަމަށް ވެއްޖެޔާމު އެކަމާމެދު ފާޑުކިޔަންވާނެއެވެ. ކަންކަން ރަނގަޅުކުރެވޭނީ ފާޑުކިޔައިގެންނެވެ. ކަންކަމާމެދު ފާޑު ނުކިޔޭނެނަމަ ޑިމޮކުރަސީއެއްގެ ބޭނުމަކީ ކޮބައިތޯ ބުނެދީބަލާށެވެ؟ އެކަން ނޭގެންޏާމު، ގޮނޑި ބަހައްޓާފައި ގެއަށް ވަޑައިގަންނަވާށެވެ. ކޮންމެހެން މަޖިލީހުގެ ތެރޭގައި އަނެއްކާ ވެސް ޑުރާމާ ކުޅެން ފަށާނެކަމެއްނެތެވެ. މިދިޔަ މަޖިލީހުގެ ދައުރުންވީ ވަރުން ފުދިއްޖެއެވެ. ދެން އިތުރަށް ރައްޔިތުންގެ ލާރިން އިސްރާފުކޮށް ބަޔެއްގެ ވަގުތު ނަގާލާނެ ކަމެއް ނެތެވެ. ރަނގަޅު ކަމެއް ކުރަންޏާމު މިހާތަނަށް ކޯޓުތަކުގައި ކުއްލި މައްސަލައިގެ ގޮތުގައި ހުށައެޅިފައި އޮތީ ކިތައް މައްސަލަތޯ އާއި އެމައްސަލަތައް ނުނިމި ކިހާ ދުވަހެއް ވެއްޖެތޯ ސްޕުރީމު ކޯޓަށް ނުވަތަ ވަކިވަކި ކޯޓުތަކަށް ލިޔެގެން ހޯދަބަލާށެވެ.

ސަރުކާރު ހިންގުމުގެ ބާރުތައް ހަނިކުރުމަކީ ގޯހެއް؛ ނަމަވެސް، ސްޓޭޓް މިނިސްޓަރުން އައްޔަންކުރުން ހުއްޓުވަންޖެހިއްޖެ!

ސަރުކާރު ހިންގުމުގެ ބާރުތައް ހަނިކުރުމަކީ ގޯހެއް؛ ނަމަވެސް، ސްޓޭޓް މިނިސްޓަރުން އައްޔަންކުރުން ހުއްޓުވަންޖެހިއްޖެ!

ދާދި ފަހުން ގައުމީ ޕާޓީގެ މެމްބަރު ރިޔާޒު ރަޝީދު ރައްޔިތުންގެ މަޖިލީހަށް ހުށައެޅި ބިލަކީ ސްޓޭޓް މިނިސްޓަރުންނާއި މިނިސްޓަރުންގެ ނައިބާއި އެޑުވައިޒަރުން ފަދަ ސިޔާސީ މަގާމުތަކަށް މީހުން އައްޔަންކުރުމުގައި ރައްޔިތުންގެ މަޖިލީހުން ރުހުން ހޯދުމަށް ގޮވާލާ ބިލެކެވެ. މިބިލުގެ ބޭނުމަކީ ބޭކާރު ގޮތުގައި ސްޓޭޓު މިނިސްޓަރުން އައްޔަންކުރުން ހުއްޓުވުމާއި މަގާމަށް ނޭކަށޭނަ މީހުން (އެމީހުންގެ އޮތް ކުށުގެ ރެކޯޑެއްގެ ސަބަބުން ނުވަތަ އެފަދަ އެހެން ކަމެއްގެ ސަބަބުން) އެމަގާމުތަކަށް އައްޔަންކުރުން ހުއްޓުވުމެވެ. މިފަދަ ބިލެއް އޮތްނަމަ ދިވެހި ދައުލަތަށް ހިޔާނާތްތެރިވެ މަރަށް ހުކުމްކުރެވިފައިވާ އަބްދުއްﷲ ޝާހިދަށް ސްޓޭޓު މިނިސްޓަރުކަން ދިނުމާއި ވަރުވަރުގެ ދައުލަތުން ބޮޑު މުސާރަދޭގޮތަށް އައްޔަންކުރެވޭ އެޑުވައިޒަރުންނާއި އެންވޯއިން އައްޔަންކުރުމަށް ހުއްޓުމެއް ގެނެވި، ރައްޔިތުންގެ ދިރިއުޅުން ތަނަވަސްކުރުމަށް ހުރި ފައިސާކޮޅު ރައްކާކުރެވުނީހެވެ.

ނަމަވެސް، ރިޔާސީ ނިޒާމެއްގައި ބާރުތައް ވަކިކުރެވިފައިވާ އިރު، ސަރުކާރު ހިންގުމަށް ސިޔާސީ ގޮތުން ރައީސް އައްޔަންކުރަންޖެހޭ މަގާމުތަކަށް މީހުން އައްޔަންކުރުމުގެ އިހުތިޔާރު ހަނިކުރުމަކީ އެންމެ ރަނގަޅުގޮތެއްނޫނެވެ. ސަބަބަކީ، ރައްޔިތުންގެ މަޖިލީހުގެ ތެރޭގައި އުފެދޭ ސިޔާސީ ވާދަވެރިކަމުގެ ތެރޭގައި ސަރުކާރުން އައްޔަންކުރަންޖެހޭ މަގާމުތަކަށް މީހުން އައްޔަންނުކުރެވި، އާހިރު ނަތީޖާއެއްގެ ގޮތުން ސަރުކާރުގެ ހިންގުން މަޑުޖެހިގެން ދިޔުން ގާތެވެ. މިސާލަކަށް، ހުސްނު ސުއޫދު ބަންޑާރަ ނައިބުގެ މަގާމަށް އައްޔަންކުރިޔަ ނުދޭންވެގެން ޑީއާރުޕީ އަދި ޕީއޭއިން އެކުރި މަސައްކަތަކީ ގާނޫނު އަސާސީގައި އެބުނާ ވަޒީރުންނަށް ރައްޔިތުންގެ މަޖިލީހުގެ ރުހުން ހޯދުމުގެ ނިޔަތާ ފުށުއަރާކަމެކެވެ. ސިޔާސީ އަދާވާތްތެރިކަން ނޫން އެހެން ކަމެއްނޫނެވެ. ސަބަބަކީ، އެބައިމީހުންނަށް ހުސްނު ސުއޫދު އެމަގާމަށް ނުހޮވަންވީ ރަނގަޅު ސަބަބެއް ދެއްކިފައިނުވާތީވެއެވެ.

ދެން، އުފެދޭނެ ސުވާލަކީ ރައީސްގެ ބާރުތައް ހަނިނުކޮށް ރައީސަށް ލިބިދޭ ގާނޫނީ ބާރު ނަހަމަގޮތުގައި ބޭނުންކުރުން (މިސާލަކަށް ބޭކާރު ސިޔާސީ މަގާމުތައް އުފައްދައި، ކަމަށް ނޭކަށޭނަ މީހުން އައްޔަންކުރުން) ހުއްޓުވާނީ ކިހިނެއްހެއްޔެވެ؟ މިކަން ކުރެވޭނެކަމަށް ފެންނަ ގޮތަކީ މިހާރު ރިޔާޒު ރަޝީދު ރައްޔިތުންގެ މަޖިލީހަށް ހުށައަޅައިގެން އުޅޭ ބިލު ކޮމެޓީއަކަށް ފޮނުވައިގެން ބޮޑެތި އިސްލާހުތަކެއް ގެނެސް، ސަރުކާރުގެ ސިޔާސީ އޮނިގަނޑާބެހޭ ބިލެއް އެކުލަވާލުމެވެ. ހުންނާނެ މިނިސްޓްރީތަކުގެ އަދަދާއި، ކޮންމެ މިނިސްޓްރީއެއްގައި ތިބޭނެ ސިޔާސީ މަގާމުތަކުގެ އޮނިގަނޑެއް އެކުލަވާލުމެވެ. މިސާލަކަށް، ކޮންމެ މިނިސްޓްރީއެއްގައި އެންމެ މިނިސްޓަރަކާއި އެންމެ ނައިބަކާއި އެންމެ ޕޮލިޓިކަލް އެޑްވައިޒަރެއް ހުންނަގޮތަށް ހެދިދާނެއެވެ. ސްޓޭޓު މިނިސްޓަރުން ހަމަ އެކަނި ތިއްބަވާނީ ޕްރޮވިންސްތަކުގައި ކަމަށް ލިޔެވިދާނެއެވެ. ނުވަތަ އެމީހުންގެ ނަމަކަށް ގަވަނަރު ކިޔިދާނެއެވެ. މީގެ އިތުރުން ރައްޔިތުންގެ މަޖިލީހުން ފާސްކުރާ ސިޔާސީ މަގާމުތަކުގެ އޮނިގަނޑަށް މަގާމެއް އިތުރުކުރެވޭނީ އެގާނޫނު އިސްލާހުކޮށްގެން ކަމަށް ލިޔެވިދާނެއެވެ.

ސަރުކާރުގެ ސިޔާސީ އޮނިގަނޑެއް އޮތުން މުހިއްމުވަނީ

1. ދިވެހި ދައުލަތުގެ މިނިސްޓްރީތައް ދެމިގެންދާ މުއައްސަސާތަކަކަށް ހެދުން: މިހާރު މިވާގޮތަކީ ކޮންމެ ރިޔާސީ ދައުރަކަށް އަލަށް މިނިސްޓްރީއެއް އުފައްދަނީ ނޫނީ ނަން ބަދަލުކޮށްލަނީއެވެ. ކޮންމެ 5 އަހަރަކުން މިނިސްޓަރީގެ ނަން ބަދަލު ވަންޏާމު އިދާރީ ދުވެލި މަޑުވެ، ރެކޯޑު ބެލެހެއްޓުމުގައި ދަތިތަކާ ކުރިމަތިލާންޖެހޭނެއެވެ.

2. މީހުންނަށް ބަލައިގެން މިނިސްޓްރީތައް އުފެއްދުން ހުއްޓުވި، ދައުލަތުގެ ރިސޯސަސްތައް އެދެވޭ ގޮތުގައި ބޭނުންކުރެވުމުގެ ފުރުސަތު ފަހިވުން: މިހާރު މިވާގޮތަކީ ކޮންމެވެސް މީހަކު މިނިސްޓަރަކަށް ހަދަންވެގެން މިނިސްޓްރީއެއް އުފައްދަނީއެވެ. ހަގީގަތުގައި އެފަދަ މިނިސްޓްރީއަކީ އެހެން މިނިސްޓްރީއެއްގެ ޑިޕާޓުމަންޓެއްގެ ގޮތުގައި ހިންގިދާނެފަދަ ތަނެކެވެ.

3. ސިޔާސީ މަގާމުތަކަށް ދައުލަތުގެ ހަޒާނާއިން ކުރެވޭ ހަރަދުތަކަކީ ހިފެހެއްޓިފައިވާ އެއްޗެއްކަމުގައި ހެދުން: ރިޔާސީ ނިޒާމު ހިންގާ އެމެރިކާއިން ފެންނަނީ ވެރިކަން ބަދަލުވުމާއެކު ސިޔާސީ މަގާމުތަކުގައި ތިއްބަވާ ބޭފުޅުން ބަދަލުވާތަނެކެވެ. ރާއްޖޭގައި ވާގޮތަށް މިނިސްޓްރީތައް އިތުރުވެ، އެތަކެއް އާ ސިޔާސީ މަގާމުތަކެއް އުފެދިގެންދާތަނެއް ނުފެނެއެވެ.

ރިޔާސީ ކޮމިޝަން: ޒައީމް މައުމޫނުގެ އަނެއް ގޭމު؟!

ހެޔޮވެރިކަމެއްކޮށް، ގާނޫނު އަސާސީއާ އެއްގޮތަށް ގާނޫނުގެ ވެރިކަމެއް ކުރަންކަމަށް ތަކުރާރުކޮށް ބުނަމުން އައިސް، ކޮންމެ ފަހަރަކުވެސް ކަންތައް މިކުރެވެނީ ޒައީމު މައުމޫނު ދައްކަވައިދެއްވި ނަމޫނާއާ އެއްގޮތަށް ނޫންތޯއެވެ؟ ގައުމުގައި ހިގައިދިޔަ ބޮޑެތި މައްސަލަތަކާ ގުޅިގެން ޒައީމް މައުމޫނުވަނީ އޭނާއަށް އިތުބާރުކުރެވޭ ބަޔަކުލައިގެން އެތަކެއް ރިޔާސީ ކޮމިޝަނެއް ހަދާފައެވެ. އެފަދަ ކޮމިޝަންތައް ވެގެން ގޮސްފައިވަނީ ޒައީމް މާކުރިންސުރެ ކުރައްސަވާފައި އޮތް ގޮތްތަކެއް ނުވަތަ ނިންމަވާފައިވާ ގޮތްތަކަކަށް އިތުރުބާރެއް ދިނުމުގެ ގޮތުން އެހެން ބަޔަކު މީހުން ލައްވާކުރުމާ ބޭކާރު މަސައްކަތަކަށެވެ. މިހާރު އަނެއްކާވެސް ފެނިގެން މިދަނީ އެފަދަ އެހެން ރިޔާސީ ކޮމިޝަނެކެވެ. އެތަނަށް އައްޔަންކޮށްފައި ތިބި މީހުންނަކީ (މިސާލަކަށް އައްޑުވަސް ހަސީނުއާއި އަދާލަތު ޕާޓީގެ ސެއިހު ރަޝީދު) އަކީ ޒައީމު މައުމޫނާމެދު ޒާތީގޮތުންނާއި އެހެނިހެން ގޮތްގޮތުން ޖަދަލުކޮށް މަލާމާތްކޮށްފައިވާ ބަޔަކަށްވީ އިރު އެމީހުންގެ މިނިވަންކަމާމެދު ސުވާލުއުފެދެއެވެ. ދެން އެމީހުން ލިޔާ ރިޕޯޓެއް ބަޔަކު ގަބޫލުކުރާނެތޯއެވެ؟

ތެދެކެވެ. ޒައީމެއްކަމަކު ނުވަތަ އެހެން މީހެއްކަމަކު ދައުލަތުގެ ހަޒާނާއަށް ހިޔާނާތްތެރިވެ، އެތަކެއް މުދަލަކާ ފައިސާއެއް ފޮރުވައިގެން އުޅެންޏާމުވާނީ އެތަކެއްޗެއް ހޯދައި އޭގެ ހައްގުވެރިންނަށް ހަވާލުކުރާށެވެ. އެއީ މިއަދު ރައީސް ނަޝީދުގެ ބޮލުގައި އެޅިފައިވާ ވާޖިބެކެވެ. އެކަން ނުކޮށެއް ނުވާނެއެވެ. މިގައުމު ތަރައްގީކޮށް އާރާސްތުކުރުމަށް އެފައިސާތަކާއި މުދާތައް ބޭނުމެވެ. ނަމަވެސް، ގޯހަކީ އެކަން ކުރަން އުޅޭ ގޮތެވެ. ގާނޫނު އަސާސީގެ ދަށުން އުފައްދާފައި ހުރި މިނިވަން އެތަކެއް މުއައްސަސާތަކެއް ހުއްޓާމެ، އެމުއްސަސާތަކުގެ ގާނޫނީ ބާރާ ފުށުއަރާގޮތަށް އަމިއްލައަމިއްލައަށް ބާރުތަކެއް ހޯދައިގެން ތިމާ އިތުބާރުކުރާ ދެތިން މީހަކުލައިގެން ކުރިން ޒައީމު މައުމޫނުވެސް ޖައްސާ ކަހަލަ ގޭމުޖައްސާތީވެއެވެ. ބަލަ، ތިޔަ ރިޔާސީ ކޮމިޝަނެއް ހަދައިގެން ތިޔައުޅެނީ މިނިވަން މުއައްސަސާތަކުން އެއްބާރުލުން ނުދޭތީހެއްޔެވެ؟ ނޫނީ އެވެރިން އެކަން ނުކުރަން ތިބީމާ ހެއްޔެވެ.

މިކަން ކުރާނެ ރަނގަޅުގޮތެއް ބުނެދެން ހެއްޔެވެ؟ ނިކަން ތިޔަ ރިޔާސީ ކޮމިޝަނުން ކުރީގެ ރައީސާ އޭނާގެ ބައިވެރިން ކުރިކަމަށް ބުނާ ކޮރަޕްސަންގެ މައްސަލަތައް ދައުލަތުގެ އެކި މިނިސްޓްރީތަކުންނާއި ޑިޕާޓްމަންޓުތަކުން އެއްބާރުލުން ހޯދައި ލިސްޓުކޮށްބަލާށެވެ. ރިޔާސީ ކޮމިސަނުގެ މަގުސަދަކީ 2 ކަމެއްކަމުގައި ހަދާށެވެ. 1. ބައިތުލްމާލުން މަދުވާ ފައިސާ ހޯދުން. 2. ކުރީގެ ވެރިންނާމެދު ކުރެވޭ ތުހުމަތުތަކުން އެމީހުން މިންޖުކޮށް، އެމީހުންނަށް ހައްގުވާ ރީތިނަން އެމީހުންނަށް ލިބިދިނުން. ތަހުގީގުކޮށް، މީހުން ބަންދުކޮށް ހަދާނެކަމެއްނެތެވެ. އެކަމާޖެހުމުން އެންޓިކަރަޕްސަން ކޮމިޝަނާ ހަވާލުކުރާށެވެ. ނޫނީ ބައްޑާރަ ނައިބު މެދުވެރިކޮށް ދައުލަތުގެ ހަޒާނާއިން މަދުވާކަމަށް ފެންނަ ބައި ހޯދުމަށް އެންޓިކަރަޕްސަން ކޮމިޝަނާ ހަވާލުކުރާށެވެ. އަދި އޮޑިޓު ރިޕޯޓުތަކުގައި ހުރި މައްސަލަތައް ތަހުގީގުކުރުމަށް އެކަމާ ބެހޭ މުއައްސަސާތަކަށް ބާރުއަޅާށެވެ. ކޮމިޝަނުގެ ދުވެލި ބާރުކޮށްދިނުމުގެ ގޮތުން އެތަނަށް ބޭނުންވާ އެހީތެރިކަމާ އެއްބާރުލުން ސަރުކާރުން ފޯރުކޮށްދޭށެވެ.

އެމްޑީޕީގެ ފަރާތުން ރައްޔިތުންގެ މަޖިލީހަށް ކުރިމަތިލައިގެން ރައްޔިތުން ގަބޫލުނުކުރި ފަރާތްތަކަށް ދައުލަތުގެ ބޮޑެތި މަގާމުތައް؟!

ރައްޔިތުންގެ މަޖިލީހަށް ކުރިމަތިލައިގެން ނާކާމިޔާބުވި ފަރާތްތަކަށް އިންތިހާބުގެ ފަހުން ދައުލަތުގެ ބޮޑެތި މަގާމުތަކެއް ކުރީގެ ރައީސް މައުމޫނު ދެއްވުމާގުޅިގެން އެންމެ ބޮޑަށް މަލާމާތުކުރި މީހަކީ މިހާރުގެ ރައީސް ނަޝީދާއި އޭނާގެ ބައިވެރިންނެވެ. އިންތިހާބުން ފެއިލިވި މީހުންނަކީ ރައްޔިތުން ބޭނުންނެތިގެން އެއްލާލި ބަޔެއްކަމާއި އެފަދަ މީހުންނަށް ދައުލަތުގެ ބޮޑެތި މަގާމުތައް ދިނުމަކީ ރައްޔިތުންނަށް ކުރެވޭ މަލާމާތެއްކަމާއި ފުރައްސާރައެއްކަމަށް އެދުވަހު އެމީހުން ބުނެތެވެ. މާލޭގެ ގޮނޑިއަށް އަބްދުއްﷲ ކަމާލުއްދީން ކުރިމަތިލައިގެން ނާކާމިޔާބުވުމާގުޅިގެން ޖެހިގެންއައި ދުވަހު ދައުލަތުގެ މިނިސްޓަރުކަން ދިނުމާއި ތިމާ އުފަން ރަށް ހިމެނޭ އަތޮޅަށް ކުރިމަތިލައިގެން ރައްޔިތުން ގަބޫލުނުކުރި ސީނާ ޒާހިރު ރައީސުލްޖުމްހޫރިއްޔާގެ މެމްބަރެއްގެ ގޮތުގައި ރައްޔިތުންގެ މަޖިލީހަށް ވައްދައި، ސަރުކާރުގެ ނުފޫޒުން އޭނާ މަޖިލީހުގެ ރައީސަކަށް ހެދި ވާހަކަ ތަކުރާރުކޮށް އެކި ސްޓޭޖުތަކުގައި ދައްކާއުޅުނެވެ. މިއަދު އެވާހަކަތައް ހަދާން އެބަހުރިތޯއެވެ؟

މިއަދުގެ ވަގުތެއްގައި ރައީސް ނަޝީދު އެވަނީ ކުޅުދުއްފުށީ އުތުރު ދާއިރާއަށް ކުރިމަތިލައްވާ ނާކާމިޔާބުވެ ވަޑައިގެންނެވި މ. އުނިމާގޭ އަޙްމަދު އާދިލަށް މިނިސްޓަރ އޮފް ސްޓޭޓް ފޯރ ހޯމްއެފެއަރޒްގެ މަޤާމުކަން ދެއްވާފައެވެ. އަލިފުށި ދާއިރާއަށް ކުރިމަތިލައްވާ ނާކާމިޔާބުވެ ވަޑައިގެންނެވި މ. ޖަވާހިރުވާދީ މުޙައްމަދު ރަޝީދު ޙުސައިން (ބިގޭ ) އަށް މިނިސްޓަރ އޮފް ސްޓޭޓް ފޮރ ހިއުމަން ރިސޯސަސް، ޔޫތު އެންޑް ސްޕޯޓްސް މަޤާމުކަން ދެއްވާފައެވެ. އަދި މައްޗަންގޯޅީ އިތުރު ދާއިރާއަށް ކުރިމަތިލައިގެން ނާކާމިޔާބުވި އަހުމަދު ހަލީމް (ދޮންބިލެތް) އެވަނީ އެމްޑީޕީގެ މީޑިޔާ ކޯޑިނޭޓަރުކަމުގެ މަގާމަށް އެއްވެސް އިއުލާންކުރުމަކާ ނުލައި އައްޔަންކޮށްފައެވެ. ބޭނުމަކީ ކޮބާތޯއެވެ؟ ޒައީމު ކަންކުރާ ގޮތްތަކަށް މަލާމާތްކޮށްފައި، ޒައީމުގެ ފިޔަވަޅު މަތިން ފިޔަވަޅެއް އެޅުން ނޫންކަމެއް އެބަކުރެވޭތޯއެވެ؟ ތަކުރާރުކޮށް ވިދާޅުވަމުން އަންނަ ހެޔޮވެރިކަމާއި ޑިމޮކުރަސީގެ ރިވެތި މިސާލުތައް މިހާރު ކޮބައިތޯއެވެ؟

އަދިވެސް އަހަރެމެން މިތިބީ އެގޮތުގައެވެ. އަދި ގަބޫލުކުރަނީ ވެސް އެގޮތަށެވެ. ރައްޔިތުން ބަލައިނުގަތް ބަޔަކު ރައްޔިތުންގެ ވެރިންނަށް އިސްކުރުމަކީ ރައްޔިތުންނަށް ކުރެވޭ މަލާމާތެއް ނުވަތަ ނުފައްސާރައެކެވެ. ދައުލަތުން އެހެން ކޮންމެވެސް މަގާމެއް ދިނުމުގައި މައްސަލައެއް ނެތެވެ. މައްސަލައަކީ ޒައީމު މައުމޫނުގެ ފިޔަވަޅުމަތީ ފިޔަވަޅު ބަހައްޓަމުން ދައުލަތުގެ ބައިތުލްމާލުން އިސްރާފުކުރާތީވެއެވެ. ރައްޔިތުންގެ ވޯޓުން ރައްޔިތުންގެ ވެރިންނަށް ތިބުމަށް ބޭނުންނޫން ކަމަށް ބުނި ބަޔަކު އަނެއްކާވެސް ގެނެސް ރައްޔިތުންގެ މައްޗަށް އަމުރުކުރާ ބަޔަކު ކަމަށް އިސްކުރީތީވެއެވެ.

މާރިޔާގެ އެހެން ކޮއްކޮއަކަށް އަނެއްކާވެސް ބޮޑު މަގާމެއް

މިއަދުގެ ވަގުތެއްގައި މާރިޔާގެ އެހެން ކޮއްކޮއެއް ކަމަށްވާ މިފްޒާލް އަހުމަދަށް އެޑްވައިޒަރ އޮން އިންވެސްޓުމަންޓުގެ (ނުވަތަ އިންވެސްޓުމަންޓުތަކާބެހޭ މުސްތަޝާރުގެ) މަގާމު ރައީސް ނަޝީދު ދެއްވައިފިއެވެ. މިމަގާމަކީ ބެލެވޭ ގޮތުގައި މިނިސްޓަރުންގެ ނައިބު ފެންވަރުގެ މަގާމެކެވެ. ކުރިން ވެސް ވަނީ މިނިސްޓަރުންގެ ނައިބުގެ މަގާމާއި އެފެންވަރުގެ މަގާމެއް މާރިޔާދީދީގެ އެއްބަޑު އެއްބަފާ ދެކޮއްކޮއަކަށް ދީފައެވެ. އެތަނުން އެކަކަކީ ހައުލާ އަހުމަދު ދީދީއެވެ. މަގާމަކީ ހާރިޖީ މިނިސްޓްރީގެ ނައިބެވެ. ދެން އަނެއް ކޮއްކޮއަށް މަގާމެއް އުފެއްދީ ރައީސް އޮފީހުގައި ނައިބު މިނިސްޓަރުންގެ ފެންވަރުގައެވެ.

މިފަހަރު މިފްޒާލަށް އުފައްދާދިން މަގާމަކީ މިނިސްޓްރީ އޮފް އިކޮނޮމިކް ޑިވެލޮޕްޓުމަންޓުގައި އަލަށް އުފެއްދި ސިޔާސީ މަގާމެކެވެ. އެ މިނިސްޓަރީގައި ވަރުވަރުގެ ޑިރެކްޓަރުންނާއި މިނިސްޓަރުގެ ދަށުން ސްޓޭޓު މިނިސްޓަރަކު (އާދިލް ސަލީމް) ހުންނަވަނިކޮށް އަނެއްކާވެސް ދައުލަތުގެ ބަޖެޓަށް ބާރުބޮޑުވާނެ ފަދަގޮތަކަށް އަލަށް ސިޔާސީ މަގާމެއް އުފެއްދީތީ ސުވާލު އުފެދެއެވެ. މިއީ ކޮންމެހެންވެސް ބޭނުންވެގެން އުފެއްދި މަގާމެއްތޯ ނޫނީ ޒައީމު މައުމޫނު ހައްދަވާހެން ކޮންމެވެސް މީހަކަށް ބޮޑު މުސާރަޔާއި އިނާޔަތްތަކެއް ދިނުމުގެ ބޭނުމުގައި އުފެއްދި މަގާމެއްތޯ އަހާލަން މިއޮތީ ޖެހިފައެވެ.

މައުމޫނުގެ ސަރުކާރު ގޯސްވެގެން އުޅުނުއިރު، ދައުލަތުގެ ބޮޑެތި މަގާމުތައް އާއިލީ މީހުންނަށް ހަދިޔާގެ ގޮތުގައި ދޭތީވެ އެކަމާ ނުރުހިގެން މާރިޔާމެން ރައީސް ނަޝީދުމެން ދުވާލު ދެއިރަށް މުޒާހަރާކޮށް އުޅުނު ހަދާންވޭތޯއެވެ؟ ހަމަޔާ އުސޫލު ގަބޫލުކުރާ އެމްޑީޕީގެ މެމްބަރުން ސަރުކާރާ މެދު ހިތްހަމަ ނުޖެހެނީ މިފަދަ ކަންތައްތަކާހުރެއެވެ. ދާދިފަހުން ބޭއްވި ރައްޔިތުންގެ މަޖިލީހުގެ އިންތިހާބުގައި އެމްޑީޕީއަށް ނިސްބަތްވާ އެތައް ބަޔަކު އިންތިހާބުގައި ވޯޓުނުލައި ދުރުގައި ކުޅިބަލަންތިބީ މިފަދަ ސަބަބުތަކާހުރެއެވެ. އެވަރުންވެސް ރައީސް ނަޝީދަށް ފިލާވަޅެއް ލިބުނު ހެންނެއް ހިޔެއްނުވެއެވެ.

ކޮއިމަލާ ވެބްސައިޓަށް ދިންކަމަށް ބުނާ އިންޓަވިޔޫ ޑރ. ޝިހާމު ދޮގުކުރައްވައިފި!

ދާދިފަހުން ކޮއިމަލާ ވެބްސައިޓުގައި ވަނީ އެސައިޓުގެ ފަރާތުން އެމް.އެމް.އޭ (ރާއްޖޭގެ މަރުކަޒީ ބޭންކު) ގެ އިސްލާމީ އިގްތިސާދީ އެޑްވައިޒަރު ޑރ ޝިހާމު އިންޓަވިޔުއެއް (ބަސްދީގަތުމެއް) ދިންކަމަށް ބުނެ ވަރަށް ދިގު އިންޓަވިޔުއެއް ޖަހާފައެވެ. ނަމަވެސް، މިއަދުގެ ވަގުތެއްގައި އެކަމާ ބެހޭ ގޮތުން މިއަދު ނޫހުގެ ރިޕޯޓަރަކު ކުރި ސުވާލަކަށް ޑރ. ޝިހާމު ވިދާޅުވަނީ އެފަދަ އިންޓަވިޔުއެއް އެވެބުސައިޓަށް ދެއްވާފައި ނުވާނެކަމަށެވެ. ވަރަށް ބޮޑަށް ކޯފާ އިސްކުރައްވައި ވިދާޅުވިކަމަށް ވަނީ އެބޭފުޅާއަށް ނިސްބަތްކޮށް ދޭދޭ މީހުންގެ މެދުގައި ފިތުނަ އުފެދޭ ޒާތުގެ ވާހަކަ ނުފެތުރުމަށާއި އެކަމަށް ފަހުން ރައްދު ދެއްވާނެކަމަށެވެ. މިހެން އެވިދާޅުވީ އެއިންޓަވިޔުގައި އިސްލާމިކް މިނިސްޓްރީގެ ސްޓޭޓް މިނިސްޓަރު މުހައްމަދު ޝަހީމު އަލީ ސައީދުއާ ދާމެދު މީހުންގެ މެދުގައި ރުޅިވެރިކަމާ ނަފުރަތު އުފެއްދުމަށް ލިޔެފައިވާތީވެއެވެ.

މިކަން ވެފައިވާ ގޮތެއް ހޯދުމަށް ބެލިބެލުމުގައި އަހަރެމެންނަށް އެނގުނީ (ހ) ކޮންމެވެސް ވަރެއްގެ ހަގީގީތެއް އެބަސްދީގަތުމުގައި ހުރިޔަސް އެފަދަ އިންޓަވިޔުއެއް ޑރ ޝިހާމު ކޮއިމަލާއަށް ނުވަތަ އެހެންވެސް ސައިޓަކަށް މިފާއިތުވީ ދެމަހެއްހައި ދުވަހު ދެއްވާފައިނުވާކަމާއި (ށ) ވަރަށް ބޮޑަށް ވާހަކަ ވިއްސައި ނުވަތަ އަމިއްލައަށް ވާހަކަ ހަދައިގެން ލިޔުނުމީހެއްގެ މަގުސަދު ހާސިލުކުރުމަށް މަސައްކަތްކޮށްފައިވާކަމާއި، (ނ) އަމިއްލައަށް ހަދަހަދައިގެން ކުރިންވެސް އެފަދަ އިންޓަވިޔުތައް އެކި މަޝްހޫރު މީހުންގެ ނަމުގައި އެސައިޓުގައި ލިޔެފައިވާކަމާއި، (ރ) އެސައިޓަކީ ޔާމީން އަބްދުއްގައްޔޫމާއި އޭނާގެ ޕާޓީ ޕީ.އޭގެ މަސްލަހަތަށް ލިޔާބަޔަކުކަމަށްވެފައި ބުރުމާ ގާސިމު ދެކެ އަންނަ ރުޅީގައި ނިމިގެންދިޔަ ރިޔާސީ އިންތިހާބުގައި ގާސިމަށް އަދާލަތުން ބައިއަތު ހިފުމުން އޭގެ ހަސަދަ އަދާލަތުގެ ބޮޑުންނަށް ބާލަން ބޭނުންވާކަމާއި (ބ) އަންނިގެ ސަރުކާރުގެ ތާއީދު ރައްޔިތުންގެ މެދުގައި ގެއްލެމުން ދިޔުމާއި އަދާލަތުން އަންނިގެ އަތުގައި ހިފައިގެން ތިބުމުގެ ސަބަބުން ދީނީ އިލުމުވެރިންނަށްވެސް އެނަފުރަތުން ބަޔެއް އަޅަމުންދާތީވެ ކޮއިމަލާ ސައިޓުގެ ކިޔުންތެރިން އިތުރުކޮށްލުމަށް ޖެހި ކެހިވެރި މަޅިއެއްކަމެވެ.

މިހިނދުގައި އަހަރެމެން އަދާލަތަށް ގޮވާލަނީ ތާކުންތާކު ނުޖެހޭ ކޮސް ލިޔުންތައް ލިޔެފައި އެމީހުންގެ ވެބުސައިޓުގައި ނުޖެހުމަށާއި، އެފަދައިން ކަންތައް ކުރުމަކީ ދީނަށް ނަފުރަތުކުރާ މީހުންނަށް ލިބޭ އިތުރު ހިތްވަރެއްކަމާއި، އަންނިގެ ސަރުކާރުގެ ހިންގުން ދޯހަޅިވެ ފާޑުކިޔުން އިތުރުވަމުންދާއިރު ދީނީ އިލުމުވެރިންގެ އަގުވައްޓާލުމަށް އިސްލާމްދީންދެކެ ނަފުރަތުކުރާ ބަޔަކު މަސައްކަތް ފަށާފައިވާއިރު އެފުރުސަތު އެގިތިބެ އެވެރިންނަށް ނުދިނުމަށެވެ. ހަމައެއާ އެކު ޝަހީމަށް ބުނެލަންއޮތީ ނަމުގެ ކުރިޔަށްލައިގެން ތިޔަ އުޅޭ "ފަޟީލަތުއް އުސްތާޒުލް ޝައިހު" ފަދަ ތިމާގެ ހައިބަތު އެހެން މީހުންގެ ކުރިމަތީގައި މަތިވެރިވާފަދަ ނަންނަމުން ދުރުހެލިވުމަށާއި ކުރީގެ ދިރިއުޅުމުގެ މަތިން ހަދާންކޮށް އަމަލުތައް ސީދާކުރުމަށެވެ. ރައްޔިތުންނަށް އޭގެ ފައިދާ ކުރާކަމަށްވަންޏާމު އައްނިގެ ސަރުކާރުގެ މިނިސްޓްރީއެއް ބެލެހެއްޓުމުގައި ގޯހެއްނެތެވެ. ނަމަވެސް، ފިގުހު އެކަޑެމީ ވީހާ އަވަހަކަށް ގާނޫނަކުން މިނިވަންކޮށް މިނިސްޓްރީއިން ބޭރުކޮށް ހަރުދަނާ ގަވާއިދެއްގެ މަތިން ހިންގޭތޯ ބަލާށެވެ.

ގުޅޭ ލިޔުން:

ކޮއިމަލާ ސައިޓަށް ޑރ. ޝިހާމު ދެއްވިކަމަށް ބުނާ އިންޓަވިޔު

މިއަދު ނޫހުގައި ކޮއިމަލާގެ އިންޓަވިޔު ދޮގުކުރިކަމަށް ބުނާ ހަބަރު

ދ. މީދޫ ދާއިރާއަށް ސަންޓުރެވަލް ޝިޔާމު؟!

ރައްޔިތުންގެ މަޖިލީހުގައި އެންމެ ފަރުވާކުޑަ މެމްބަރަކީ ދ. މެމްބަރު (ސަންޓުރެވަލް) އަހުމަދު ޝިޔާމު

މިހާރު މުއްދަތު ހަމަވަން ކައިރިވެފައިވާ ރައްޔިތުންގެ މަޖިލީހުގެ ހާޒިރީ ދައްކާގޮތުން މަޖިލީހުގެ މަސައްކަތަށް އެންމެ ފަރުވާކުޑަ މެމްބަރަކީ ދ. އަތޮޅުގެ މެމްބަރު (ސަންޓުރެވަލް) އަހުމަދު ޝިޔާމެވެ. އެންމެ 28 ޖަލްސާއަށް ހާޒިރުވެ، ހާޒރިއިން %32 ހޯދައި މެމްބަރުންގެ ހާޒރީއިން ފަހަތުން އެއް ވަނަ ހޯދާފައިވެއެވެ. ނިމިގެންދިޔަ ރައްޔިތުންގެ މަޖިލީހުގެ ދައުރުގައި 86 ޖަލްސާ ބޭއްވުނުއިރު، އޭގެތެރެއިން 58 ޖަލްސާ ހިގަމުން ދިޔައިރު ޝިޔާމު އުޅުނީ ރައްޔިތުންގެ މަޖިލީހުން ދޫކޮށްފައިވާ ރަތް ޕާސްޕޯޓުގައި އަމިއްލަ ވިޔަފާރި ދަތުރުތަކުގައި ނޫނީ އަބިދަރިންނާ އެކު މަޖާކޮށްލުމަށް ރާއްޖޭއިން ބޭރުގައެވެ. (ތަފުސީލު ބައްލަވާލެއްވުމަށް މިލިންކަށް ކުލިކުކޮށްލަވާށެވެ.) އަނެއްކާވެސް މީނާ (އަހުމަދު ޝިޔާމު މުހައްމަދު، ގ. ސަންސެޓް، މާލެ) މިވަނީ އަމިއްލަ މެމްބަރެއްގެ ގޮތުގައި ދ. އަތޮޅުގެ މީދޫ ދާއިރާއަށް ކުރިމަތިލާފައެވެ.

މީނާއަކީ ދެރިސޯޓެއްގެ ވެރިޔަކަށްވީއިރުވެސް، އަދި ރައްޔިތުންގެ މަޖިލީހުގެ ގަވާއިދުގައި އަމިއްލަ މަސްލަހަތު ހިމެނޭ ކަންކަމުގައި ވޯޓުދީގެން ނުވާނެކަމަށް ހުދާއި ކަޅުން ލިޔެފައި އޮއްވާމެ، ތިމާގެ އަމިއްލަ ރިސޯޓުތަކުގެ މުއްދަތު އިތުރުކުރުމަށްޓަކައި (ރައްޔިތުންގެ މަސްލަތު ހަދާން ނައްތާލައި) މަދުފަހަރު ނޫނީ މަޖިލީހުގެ ޖަލުސާއަށް ނާންނަ މިކަލޭގެ ވަނީ ވޯޓުދީފައެވެ. މީގެ އިތުރުން، ސުނާމީގެ ދުވަސްވަރު ޑީއާރުޕީގެ ނައިބު ޒައީމަކަށްވެހުރެ ރާއްޖޭގެ އިގުތިސާދު އަލުން އާރާސްތުކުރުމަށް ބޭރުގެ ފަރާތްތަކުން ދިން ލޯނު އެހީތަކުގެ ބޮޑު ބަޔެއްވަނީ ތިމާގެ އަމިއްލަ ރިސޯޓުތައް މަރާމާތުކުރުމަށް މަގާމާއި ބާރާއި ނުފޫޒުގެ ބޭނުންކޮށް މައުމޫނުގެ ސަރުކާރު މެދުވެރިކޮށް ހޯދާފައެވެ. ދ. އަތޮޅު މީހުންނަށް ލާރީގެ ދަޅަ ދައްކައިގެން މިފަދަ ޖާހިލު ވިޔަފާރިވެރިން ކުރާ ކަމަކީ މިއީއެވެ.

ކުރީގެ ރައީސް މައުމޫނުގެ ކޮއްކޮ ޔާމީނުގެ އެހީތެރިކަމުން މުއްސަދިވީ މީހުންގެ ތެރޭގައި ހިމެނޭ ނ. ކުޑަފަރީ އަށް އުފަން ޝިޔާމުވަނީ ޔާމީނާއެކު އެންމެ ކުރީކޮޅުގައި ޑީއާރުޕީއަށް ވަދެފައެވެ. އެއަށްފަހު، ޔާމީނުގެ އާރާއިބާރު ކެޑުމުން ޖާބިރެކޭ އެއްފަދައިން ޔާމީނާ ދުރަށްޖެހި، އެންމެފަހުން މައުމޫނުގެ ވެރިކަން ވެއްޓުމުން އެވަނީ ބާރާއި ނުފޫޒުގެ ބޭނުމުގައި ފައިސާ އޮއްސަމުން ދިޔަ ޑީއާރުޕީއިންވެސް ވަކިވެފައެވެ. އެމްޑީޕީއަށް މާދަމާ ނުވަންނާނެކަމެއްވެސް ނޭގެއެވެ. މީނާ ފައިސާ ހަރަދުކޮށްގެން ހިންގާ ސަން ރޭޑިޔޯއާއި އިރުއޮބުޒޯވަރަކީ ހަމައެކަނި ސިޔާސީ ޖާހާ މަގާމަށްޓަކައި ކުރާ ކަންތައްތަކެކެވެ. މިފަދަ ސިޔާސީ ހިޔަޅުންގެ ކިބައިން ދާލު އަތޮޅުގެ ރައްޔިތުން ސަލާމަތްވެ ތިބުމަށް ވަސިއްޔަތްކުރަމެވެ. އަހަރެމެން މިފަހަރު ރައްޔިތުންގެ މަޖިލީހަށް ހޮވަންވީ ސަންޓްރެވަލު ޝިޔާމުމެން ކަހަލަ ރާބޮއި މަސްތުވެ، ދޮން އަންހެންކުދިންނާއެކު ގައިގޯޅިކޮށް އުޅެފައިވާ ފޮޓޯތަކެއް އިންޓަނެޓަށް ލީކުވެފާވާ ގޮތެއްނެތް މީހުންނެއް ނޫނެވެ.

ރައްޔިތުންގެ ކަންތައްތައް ހެޔޮމަގަށް އަޅުވައި، ހެޔޮވެރިކަމެއް މިދިވެހި ފަސްގަނޑުގައި ގާއިމުކުރެވޭނީ ފައިސާ އޮތީތީވެ ވޯޓުގަނެވޭނެކަމަށް ގަބޫލުކުރާ ސަންޓްރެވަލް ޝިޔާމުމެން، ޖާބިރުމެން، ގައްދޫ ޒާހިރުމެން، ތަސްނީމުމެން، ޖަންގިޔާ ނާޒިމުމެން، އޭޑީކޭ ނާޝިދުމެން، ހަމްޒާމެން އަދި އެނޫނަސް އެފަދަ ފާސިގު ވިޔަފާރިވެރިންގެ ކިބައިން ރައްޔިތުންގެ މަޖިލީސް ސަލާމަތްކުރެވިގެންނެވެ. މިމީހުންގެ ހަމައެކަނި ބޭނުމަކީ ރަތްޕާސްޕޯޓާއި، މެމްބަރުކަމުގެ ހައިބަތާއި ތިމާގެ އަމިއްލަ ވިޔަފާރިކުރިއެރުމަށްޓަކައި ސިޔާސީ ބާރާއި ނުފޫޒެވެ.