މެމްބަރުންގެ އަދަދު 42 އަކަށް ކުޑަކުރާކަށް ނުވޭތަ؟

ކުރިން މަޖިލީހުގައި ތިބެނީ 50 މެމްބަރުންނެވެ. އެއީ ރައީސްގެ 8 މެމްބަރުންނާ ލައިގެންނެވެ. ކޮންމެ އަތޮޅަކަށް ދެމެމްބަރުންނެވެ. މިހާރު ތިބެނީ 77 މެމްބަރުންނެވެ. އެއީ އާބާދީގެ ނިސްބަތަށް ބަހާލައިގެންނެވެ. މަޖިލީހުގެ އަދަދު އިތުރުކުރެވުނީ ކުރިޔާ ހިލާފަށް އާބާދީގެ ނިސްބަތުން މެމްބަރުންގެ އަދަދު ކަނޑައެޅުމަށާއި ރައްޔިތުން ވީހާވެސް ބޮޑަކަށް ތަމްސީލު ކުރުމަށެވެ. މިކަމުން ލިބުނު ފައިދާއެއް މިހާރު ފެންނާކަށް ނެތެވެ. މިއަދު ފެންނަނީ އަމިއްލަ އެދުމުން ފުރިފައިވާ ބަޔަކު ދައުލަތުގެ ހަޒާނާ ހުސްކުރަން އުޅޭތަނެވެ. ރައްޔިތުން އުޅޭ ނިކަމެތި ހާލެއް ބެލުމެއްނެތެވެ.

މެމްބަރުންގެ ހަރަދު:

މެމްބަރުންގެ މުސާރަ އާއި އެލަވަންސްތަކާއި އިންޝުއަރެންސަށް ދުވާލަކު 3 ލައްކަ 97 ހާސް 233 ރުފިޔާ 67 ލާރި ހަރަދުކޮށް، މެމްބަރުންނާއި މަޖިލީހުގެ އެހެނިހެން މުއައްޒަފުންގެ ސައިފޮދަށް މަހެއްގެ މައްޗަށް 1 ލައްކަ 89 ހާސް ރުފިޔާ ހަރަދުކުރާއިރު، އެމީހުންގެ ފަރާތުން ރައްޔިތުންނަށް ލިބޭ އެއްޗެއް ނެތެވެ. ފެންނަނީ ބޭވަފާތެރިކަމާއި އަމިއްލަ އެދުމެވެ. ގެއްލި އެދަނީ ރާއްޖޭގައި ތަރައްގީގެ މަސްރޫއުތައް ހިންގާނެހާ ފައިސާއެވެ. ނިކަމެތީންނަށް އެހީވާން ހުރި ފައިސާކޮޅެވެ.

މެމްބަރުންގެ މަސައްކަތުގެ އަހުލާގު:

ގައުމަށް، ރައްޔިތުންނަށް ބޭނުންވާ ގާނޫނުތަކެއް ހަދާތަނެއް ނުފެނެވެ. މަޖިލީހުގައި ކުރާ ކަމަކުން ސަރުކާރު ޒިންމާދާރެއް ނުކުރެވެއެވެ. ގައުމުގައި އަދުލު އިންސާފެއް ގާއިމެއް ނުކޮށްދެވެއެވެ. އެމީހުންގެ ޒިންމާއަކީ އެއީ ނޫންހެއްޔެވެ؟ އެއީ ވަގުތު ނަގާލުމާއި ޒުވާބުކުރުމުގައި ލާމަސީލު ބަޔެކެވެ. މިއަހަރުގެ ތިން ވަނަ ދައުރުގެ މިހާތަނަށް ބޭއްވުނު 20 ޖަލްސާއަށް ބަލާއިރު 20 ޖަލްސާއަށް ބަރާބަރަށް ހާޒިރުވެވަޑައިގެންފައިވަނީ 16 މެމްބަރުންނެވެ. ބާކީ ތިއްބެވި 61 މެމްބަރުންނަކީ ފުރިހަމައަށް ޖަލްސާތަކަށް ހާޒިރުވެވަޑައިގެންފައިވާ ބޭފުޅުންނެއްނޫނެވެ. ދެން އަދަދު ގިނަކޮށްގެން ތިބުމުގެ ބޭނުމެއް ވަކި އެބައޮތް ހެއްޔެވެ؟

މެމްބަރުން އަދަދަކަށް ވާންވީ..

ރ. އަތޮޅުމެމްބަރުކަން ކުރައްވާފައިވާ އިބްރާހިމް ޝަހީދު ޒަކީގެ ނަޒަރުގައި މެމްބަރުންގެ އަދަދު އޮންނަންވީ ވޯޓުލުމުގެ ޙައްޤުލިބިފައިވާ ކޮންމެ 5،000 މީހަކަށް މެމްބަރެކެވެ. އެއީ ގާތްގަޑަކަށް 42 މެމްބަރުންނެވެ. މިކަމަށް ވަކާލާތުކޮށް ހާއްސަ މަޖިލީހަށް އެބޭފުޅާ ހުށައެޅި ހުށައެޅުންވަނީ ފޭލިވެފައެވެ. މެމްބަރުން ގިނަ ކުރުމަށް ވަކާލާތުކުރި މާރިޔާދީދީމެން ކަހަލަ ރޯނުއެދުރުންގެ ބަހަށް އެހެންމީހުން ހެއްލުމުގެ ސަބަބުންނެވެ. ބޮޒްނިޔާ ހެރްޒަގޮވެނާ ގައި ވޯޓުލުމުގެ ޙައްޤުލިބިފައިވާ 3.5 މިލިޔަނަށްވުރެ ގިނަމީހުން ތަމްސީލްކުރަން، އެ ޤައުމުގެ ޕާލަމެންޓްގައި ތިބެނީވެސް 42 މެމްބަރުން ކަމަށް ޝަހީދު ޒަކީ ވިދާޅުވެއެވެ.

މައުލޫމާތު ނެގީ:

ހ. ރައްޔިތުންގެ މަޖިލިސް މިހާމެމްބަރުން ގިނަކޮށް ކަޑައެޅުމަކީ ވަރަށް ޒިންމާދާރުކަންކުޑަކޮށް ކުރެވިފައިވާކަމެއް

ށ. ދައުލަތުގެ އެންމެ ބޮޑު އާމްދަނީއެއް ހިނގާ އެއް މުއައްސަސާ

ނ. Proportional representation in the new Maldives Parliament

ދިވެހިފޯސްޓު ހިންގަނީ ޔާމީނުބާ؟

ކުރިން އެއީ އަބުދުއްލޯ ޔާމީނެވެ. މިހާރު ޔާމީން އަބުދުލް ގައްޔޫމެވެ. މައުމޫނަކީ ގިނަ ރައްޔިތުން ލޯބިވާ ސަހުސިއްޔަތަކަށްވެފައި، މައުމޫނުގެ ނަމާ އެއްގޮތް ކޮށްލުމުގެ ގޮތުންނެވެ. މައުމޫނުގެ ވެރިކަމުގައި ރެދުލާން ފެށި އެއް ސަބަބަކީ އެއްބަފާ ކޮއްކޮ ޔާމީނާއި ޅިޔަނު އިލިޔާހުގެ ކޯޅުމެވެ. ދެމީހުންވެސް ވެރިކަން ބޭނުމެވެ. މައުމޫނަށް ފަހުގައެވެ. ނުވަތަ މައުމޫނު ބޭރުކޮށްފައެވެ. މިލިޔުމުގެ މައުލޫއަކީ އެދެ ހަތުރުންގެ ވާހަކަ ދެއްކުމެއް ނޫނެވެ. އޭގެ ބަދަލުގައި ދިވެހިޕޯސްޓޭ ކިޔައިގެން ހިންގާ ސައިޓު ހިންގަނީ ކޮންބަޔެއްތޯ، ކޮން ވިސްނުމެއްގެ ބަޔެއްކަން މިމައުލޫއުގައި ދެތިން އެއްޗެއް ބުނެލުމެވެ.

ކޮއިމަލާ ސައިޓު:

ރައީސް މައުމޫނުގެ ވެރިކަމުގެ ފަހު ކޮޅުގައި ކޮއިމަލާ ކިޔާ ސައިޓެއް ވުޖޫދަށް އައެވެ. ކޮއިމަލާ ޑޮޓް ކޮމްގެ ގޮތުގައެވެ. މިހާރު އެސައިޓު ފެންނާކަށް ނެތެވެ.

ފާޑުކިޔާ ފަރާތްތައް: އެމްޑީޕީ، ޅިޔަނު އިލިޔާސް އިބްރާހީމް އަދި ދެބައިމީހުންގެ އެކުވެރިންނާއި އެހީތެރިން އަދި ޑރ ހަސަން ސައީދުމެންގެ ގުރޫޕް

ހުޝާމަތުކުރާ ފަރާތްތައް: އަބްދުއްލޯ ޔާމީނާއި އޭނާގެ އެކުވެރިން.

ފާހަގަކުރެވުނު ކަންތައްތައް:

ހ. މައުމޫނަށް ހެޔޮއެދެނީ އިލިޔާސަށްވުރެ ޔަމީންކަމަށް ލިޔުމެއްގައި އޮތުން

ށ. މައުމޫނަށް އަސްލު ހެޔޮއެދެނީ ޔާމީނުކަމަށް މައުމޫނުގެ ދަރިންނަށް ބުނެދީ، އިންޒާރުކޮށް ލިޔުމެއް ލިޔުން.

ނ. ޔާމީނުގެ މޮޅު ވާހަކަ ދޭތެރެ ދޭތެރެއިން ލިޔުން

ރ. މީހުން ނުދޭ އިންޓަވިޔުތައް ދިނޭ ކިޔައިގެން ލިޔަމުން ގެންދިޔުން. މިސާލަކަށް، ޑރ ޝިހާމް، އެބޭފުޅާ ކޮއިމަލާއަށް އިންޓަވިޔެއް ނުދެއްވާކަމަށް ނޫސް މަޖައްލާތަކަށް ވިދާޅުވެދެއްވީ އެވާހަކަ ކޮއިމަލާގައި ޖެހުމުންނެވެ.

ބ. އެދުވަސްކޮޅު ޔާމީނަށްވުރެ ޑރ ހަސަނުމެން މައުމޫނު އިތުބާރުކުރާ މީހުންގެ ގޮތުގައި ތިބުމާއި އެމީހުންގެ ނުފޫޒު ޑީއާރުޕީ ތެރޭގައި ބޮޑުވުން

ރާއްޖެމިއަދު:

ރާއްޖެމިއަދަކީ މިހާރުވެސް ހިނގަމުން ގެންދާ ސައިޓެކެވެ. އެޑުރެހަކީ ރާއްޖެމިއަދު ޑޮޓް ކޮމް އެވެ.

ފާޑުކިޔާ ފަރާތްތައް: މިހާރުގެ ސަރުކާރަކާއި ޑީއާރުޕީގެ ލީޑަރު ތަސްމީނަށާއި އަބްދުއްލޯ ޝާހިދު

ހުޝާމަތުކުރާ ފަރާތްތައް: ޔާމީނުގެ ލީޑަޝިޕަށާއި ޕީއޭގެ "މޮޅު" ސިޔާސަތުތަކަށް

ފާހަގަ ކުރެވޭ ކަންތައްތައް:

ހ. ޔާމީނުމެން ކުރާ ވިޔާ ނުދާކަންތައްތައް ނުލިޔުން. މިސާލަކަށް ރައްޔިތުން ފެލާލައިގެން ތިމާމެންގެ މުސާރަ ބޮޑުކުރަން ޔާމީނާއި އޭނާގެ ބައިވެރިން ވޯޓުލީ ވާހަކަ

ށ. ޔާމީނާއި އޭނާގެ ބައިވެރިން މަޖިލީހަށް ބިލެއް ނުވަތަ އެހެން އެފަދަ ކަމެއް ކޮށްފިޔާމު އަވަހަށް އެހަބަރު ޖެހުން

ނ. ތަސްމީނަށާއި އޭނާގެ އެކުވެރިންނަށް ފާޑުކިޔުމާއި އުމަރު ނަސީރަށް ތާއީދުކުރުން

ރ. ޒައީމު މައުމޫނުގެ އުފަންދުވަހު ތަހުނިޔާ ފޮނުވުމާއި މައުމޫނަށް ތައުރީފުކުރުން

ދިވެހިޕޯސްޓު:

ދިވެހިޕޯސްޓަކީ މިހާރުވެސް ހިނގަމުން ގެންދާ ސައިޓެކެވެ. އެޑުރެހަކީ ދިވެހިޕޯސްޓު ޑޮޓް ކޮމް އެވެ.

ފާޑުކިޔާ ފަރާތްތައް: މިހާރުގެ ސަރުކާރަކާއި ޑީއާރުޕީގެ ލީޑަރު ތަސްމީނަށާއި އަބްދުއްލޯ ޝާހިދު

ހުޝާމަތުކުރާ ފަރާތްތައް: ޔާމީނު، ޕީއޭގެ "މޮޅު" އިގުތިސާދީ ވިސްނުން، އުމަރު ނަސީރުގެ އެކުވެރިން، ޒައީމް މައުމޫނު

ފާހަގަ ކުރެވޭ ކަންތައްތައް:

ހ. ސިޔާސަތަށް ބެލުމުގެ ބަދަލުގައި މީހާއަށް ބަލައިގެން ފާޑުކިޔުން. މިސާލަކަށް ސަރުކާރުން ކުރާ ހުރިހާ ކަމަކާ ދެކޮޅު ހެދުމާއި ފާޑުކިޔުން. އެއް މިސާލަކީ ފެރީގެ ނިޒާމު ހުއްޓާލުމަށް ގޮވާލުން.

ށ. އެމްޑީޕީގެ މެމްބަރުން ކުރާ ހުރިހާ ކަމަކީ ގޯސްކަމަކަށް ވާއިރު، ޑީއާރުޕީގެ މެމްބަރުން ކުރާ ގޯސް ކަމެއްގެ ވާހަކަ ނުލިޔުން.

ނ. ސަރުކާރުގެ ރަގަޅު އެއްމެ ސިޔާސަތެއްވެސް ނެތުން

ރ. ތަސްމީނުގެ ރާވައިގެން މަޖިލީސް ދޮށު މުޒާހަރާކުރި ވާހަކަ ލިޔުނުއިރު، ޔާމީނު ޕާޓީގެ ހުރިހާ މެމްބަރުން ރައްޔިތުން ފެލާލުމަށް ވޯޓުލީ ވާހަކަ ނުލިޔުން.

ބ. ރައްޔިތުން ފެލާލުމަށް ޔާމީނު ވޯޓުދީފައިވާއިރު، އަހަރުގެ ސަހުސިއްޔަތަށް ހޮވުން. (އަހަރުމެން ދެކޭގޮތުގައި އަހަރުގެ އިދިކޮޅު ޝަހުސިއްޔަތަކީ އުމަރު ނަސީރެވެ. ޑީއާރުޕީގެ ނައިބު ލީޑަރުގެ މަގާމު އިންތިހާބުން ކާމިޔާބުކޮށްފިއެވެ. އެކި ނަންނަމުގައި ކެޑިނޭޅި ސަރުކާރު ޖަވާބުދާރީ ކުރުމަށްޓަކައި މުޒާހަރާކުރުމާއި އަޑު އުފުލާފައިވެއެވެ. ޔާމީނާ ހިލާފަށް އުމަރުގެ ސަޕޯޓަރުން ގިނައެވެ. ބައިވެރިވީ އިދިކޮޅު ހަރަކާތްތައްވެސް ގިނައެވެ. ޔާމީނު މުޒާހަރާތަކަށް އައިސް ވާހަކަދައްކަނީ އުމަރު އެކަންތައް އިންތިޒާމުކުރުމުންނެވެ.)

ލިޔަން ގަސްދުކުޅަ ހަމައަށް ލިޔެ ނިމުނީއެވެ. ދެން، ސުރުހީގައިވާ ސުވާލަށް އިންސާފުކުރުން ކިޔުންތެރިންނަށް ދޫކޮށްލަމެވެ.

ބަތަލުންނާއި މުނާފިގުން ދެނެގަންނީ ކިހިނެއް؟

ތަކެތީގެ އަގު ބޮޑުވެ، ގައުމު ބަޑަށް ޖެހުމާ ގާތްވެ، ރައްޔިތުން ހާލުގައި އުޅެމުންދާއިރު، ތިމާމެންގެ މުސާރަ ބޮޑުކުރުމަށް ރައްޔިތުން ހޮވާފައިވާ 62 މެމްބަރުންވަނީ ވޯޓުލާފައެވެ. އެ ރައްޔިތުންގެ ނިކަމެތި ހާލު އެގި، އެކަމާ ދެކޮޅު ހަދާފައިވަނީ އޭގެ ތެރެއިން އެންމެ 4 މެމްބަރުންނެވެ. އެއީ އެމްޑީޕީއަށް ނިސްބަތްވާ 4 މެމްބަރުންނެވެ. އެއީ ހޯރަފުށި ދާއިރާގެ މެމްބަރު އަހުމަދު ރަޝީދާއި ދާންދޫ ދާއިރާގެ މެމްބަރު މުހައްމަދު ރިޔާޒާއި އިހަވަންދޫ ދާއިރާގެ މެމްބަރު އަހުމަދު އަބްދުﷲ އަދި ތުޅާދޫ ދާއިރާގެ މެމްބަރު ނާޒިމް ރަޝާދެވެ. އެމެމްބަރުންނަށް ހިތުގެ ފުންމިނުން ޝުކުރާއި އައްސަރިބަސް ރައްދުކުރަމެވެ.

އަދި ބުނަން ހެއްޔެވެ؟ ރައްޔިތުންނަށް ހިޔާނާތްތެރިވާން ނުކެރި އެކަމަކު މުސާރަ ބޮޑުކުރަނިކޮށް، އެ ހާއިނުން (ރައްޔިތުން ފެލާލުމަށް ވޯޓުދިން މެމްބަރުން) ނާއެކު އެއްބައިވެ، އެންމެ ފުރަތަމަ އެލަވަންސް ކޮޅު ބަލާދާން އުޅޭ ބަޔަކުވެސް އެބައުޅެއެވެ. އެއީ ވަކި ކޮޅަކަށް ވޯޓު ނުލާ ގުރޫޕޯލައެވެ. ބަޔަކު ވައްކަން ކުރާއިރު، އެކަން ދެނެހުރިކަމަށް ނަހަދައި، އެކަމާ ދެކޮޅު ނެހެދުމަކީ އެކަމާ ބައިވެރިވުންކަމަށް ނޫނީ ނުވާނެއެވެ. އެހެން ކަމުން އަހަރެމެން ބުނާނީ އެއީ ފާޅުވެގެންވާ މުނާފިގުންނެވެ. އެމުނާފިގުންނަކީ

ގަލޮޅު އުތުރު ދާއިރާގެ މެމެބަރު އީވާ އަބްދުﷲ (އެމްޑީޕީ)

ހިންނަވަރު ދާއިރާގެ މެމްބަރު އިބްރާހިމް މުހައްމަދު ސޯލިހު (އެމްޑީޕީ)

ހިތަދޫ އުތުރު ދާއިރާގެ މެމްބަރު މުހައްމަދު އަސްލަމް (އެމްޑީޕީ)

ހުޅުދޫ ދާއިރާގެ މެމްބަރު އިލްޔާސް ލަބީބް (އެމްޑީޕީ)

ކެނދިކުޅުދޫ ދާއިރާގެ މެމްބަރު އަހުމަދު އީސާ (އެމްޑީޕީ)

މަހިބަދޫ ދާއިރާގެ މެމްބަރު ރުގިއްޔާ މުހައްމަދު (އެމްޑީޕީ)

އަލިފުށި ދާއިރާގެ ޔޫސުފް ނައީމް (ޑީއާރުޕީ)

ކުޑަހުވަދޫ ދާއިރާގެ މެމްބަރު އަހުމަދު އާމިރު (އަމިއްލަ މެމްބަރު)

ފަރެސްމާތޮޑާ ދާއިރާގެ އިބްރާހިމް މުއްތަލިބް (ޖުމުހުރީ ޕާޓީ)

މިމީހުންގެ ނަމުގެ ކުރިޔަށް "އިއްޒަތްތެރި މުނާފިގު" ކިޔުން މާ އައުލާކަން ބޮޑުވެގެންވެއެވެ. މިސާލަކަށް، އިއްޒަތްތެރި މުނާފިގު އީވާ އަބްދުﷲ އެވެ. އިއްޒަތްތެރި މުނާފިގު އިބްރާހިމް މުއްތަލިބެވެ. ރައްޔިތުމީހާއަށް މަހަކު 5،000 ރުފިޔާ ދައުލަތުން ދޭއިރު ރައްޔިތުންގެ ނަމުގައި ހަމައެކަނި ނިޒާމީ ނުކުތާ ނަގާބަޔެއްގެ މުސާރަ 20،000 ރުފިޔާއަށް އިތުރުކުރަން އުޅުނުއިރު ދެކޮޅު ނެހެދިންވީ ސަބަބެއް ބުނެދީބަލާށެވެ؟ ރައްޔިތުމީހާ ފެލާލާއިރުވެސް، ކުޅިބަލަން ތިބީ ކީއްވެގެން ހެއްޔެވެ؟ ހަމަ، އެކަމަށް ތާއީދު ކުރެވޭތީ ދެއްތޯއެވެ؟

ރައްޔިތުން އިތުރަށް ފެލާލަން މަސައްކަތްކުރީ ކޮންބަޔެއް؟

ރައްޔިތުން އުޅޭ ހާލެއް ބެލުމެއްނެތި، ރައްޔިތުމީހާގެ ފައިސާކޮޅު (ގައުމުގެ ހަޒާނާ) މަދުވެފައި ހުރިއިރު، ރައްޔިތުމީހާއަށް ނޭގި ތިމާމެންގެ މުސާރަ ބޮޑުކުރަން ވޯޓުލީ 62 (ފަސް ދޮޅަސް ދޭއް) މެމްބަރުންނެވެ. އެއްވެސް ނިޒާމީ ނުކުތާއެއް ނެއްގެވުމަކާ ނުލައެވެ.

އެމްޑީޕީ:

ރައްޔިތުންގެ ހަޒާނާއިން އިތުރަށް ލާރި ނެގުމަށް އެމްޑީޕީގެ 24 މެމްބަރުން ވޯޓުލާފައިވެއެވެ. އޭގެ ތެރޭގައި މައްޗަންގޮޅި އުތުރު ދާއިރާގެ މެމްބަރު މާރިޔާ އަހުމަދު ދީދީ (ޕާޓީގެ ޗެއާޕާސަން) އާއި

ހުޅުހެންވޭރު ދާއިރާގެ މެމްބަރު ރީކޯ މޫސާ މަނިކު (ޕާލަމެންޓު ގުރޫޕުގެ ރައީސް) ހިމެނެއެވެ. ރީކޯމެން، މާރިޔާމެން، ރައްޔިތުންގެ ހައްގޭ ގޮވަން ލަދު ނުގަނޭ ހެއްޔެވެ؟ ލަދުގެ ކަންފުޅެއް ހުރިއްޔާމު، ވީހާ އަވަހަކަށް މެމްބަރުކަން ދޫކޮށްލައި ގެއަށް ވަޑައިގަތުމަށް އަދަބުވެރިކަމާއެކު ދަންނަވަމެވެ.

ޑީއާރުޕީގެ ފަރާތުން:

ނޮޅިވަރަމް ދާއިރާގެ މެމްބަރު މުހައްމަދު ނަޝީދު (އެމްޑީޕީގެ ކާނަލް ނަޝީދު) ތިމާމެންގެ މުސާރަ ބޮޑުކުރަން ހުށައެޅި ބިލަށް ތާއިދުކޮށް ކެންދޫ ދާއިރާގެ މެމްބަރު އަހުމަދު ތަސްމީން އަލީ (ޑީއާރުޕީގެ ލީޑަރު) އާއި (ލީޑަރުގެ އަބިކަބަލުން) މަޑުއްވަރީ ދާއިރާގެ މެމްބަރު ވިސާމް އަލީ އާއި ޕާޓީގެ ނައިބު ލީޑަރުން ކަމަށްވާ ތޮއްޑޫ ދާއިރާގެ މެމްބަރު އަލީ ވަހީދު އާއި ގެމަނަފުށި ދާއިރާގެ މެމްބަރު އިލްހާމް އަހުމަދު ވަނީ ވޯޓުލާފައެވެ. އިދިކޮޅު ލީޑަރުންނަށް ރައްޔިތުން އުޅެމުންދާ ދަތިގޮތް އިހުސާސް ނުވަނީ ހެއްޔެވެ؟ ސަރުކާރު ޖަވާބުދާރީކުރުމަކީ މިއީ ހެއްޔެވެ؟ ސަރުކާރުން ކުރާ ހުރިހާ ގޯސްކަމެއްގައި ކަލޭމެން ބައިވެރިވެއެވެ. ރައްޔިތުންނަށް ކަމެއް ކޮށްދެންޖެހޭ ދަޑިވަޅުގައި ނިޒާމީ ނުކުތާ ނަގަމެވެ. ތިޔަ ބޭފުޅުންވެސް ގެއަށް ވަޑައިގަންނަވާށެވެ. ރައްޔިތުންގެ އިހުސާސްތައް އެގިގެން ސަރުކާރު ޖަވާބުދާރީ ކުރެވޭނެ އެހެން ބަޔަކަށް ފުރުސަތު ދޭށެވެ.

ޕީއޭގެ ހުރިހާ މެމްބަރުން، އެޕާޓީގެ ލީޑަރު މުލަކު ދާއިރާގެ މެމްބަރު އަބްދުﷲ ޔާމީންގެ ފަހަތުން ރައްޔިތުންގެ ހަޒާނާގައި ބާކީ ހުރިހުރިހާ ފައިކޮޅެއް ނަގާ ހުސްކޮށްލަން ވޯޓުދިނެވެ. އެކަމުގެ އެއް މޭސްތިރިއަކީ އެޕާޓީގެ ނައިބު ލީޑަރު ދިއްގަރު ދާއިރާގެ މެމްބަރު އަހުމަދު ނާޒިމް (ޖަންގިޔާ) އެވެ. އިގުތިސޯދޭ، ރައްޔިތުން އުޅޭ ނިކަމެތި ހާލޭ، ތިމަންމެން ރައްޔިތުންގެ ހައްގުގައި އިހުލާސްތެރިވެގެންނޭ ކިޔާނެކަމެއް ނެތެވެ. "މިއީ އަދުގެ ކުޑަ ޒައީމު" ހެދިގެން ރާއްޖެމިއަދު ސައިޓު ހިންގަން ގޭގަ ހުންނާށެވެ. ބަޅެއްގެ ނަގޫ ސަންފާ އޮނަކަށް ލިޔަސް ތެދެއް ނުވާނެއޭ ބުނާބުނުމަކީ ހަމަ ތެދެކެވެ.

ކުޅުދުއްފުށީ ދެކުނު ދާއިރާގެ މެމްބަރު މުހައްމަދު ނަޝީދު (ކުއްޓި ނަޝީދު) އަކީ ވެސް އަހަރެމެން ހީކުރި ވަރުގެ މީހެއް ނޫންތާއެވެ. އަދިވެސް "I need more cash" ދެއްތޯއެވެ؟ ތިމަންނައަކީ އަމިއްލަ މެމްބަރެކޭ، އިސްކުރަނީ ރައްޔިތުންގެ ހައްގޭ ކިޔާނެކަމެއް ނެތެވެ. އިތުރަށް ލާރި ބޭނުމިއްޔާ ދާއިރާގެ ރައްޔިތުން ކައިރީ ބުނެގެން ފަންޑު ފޮއްޓެއް ގޭގައި ބަހައްޓަންވީ ނޫންހެއްޔެވެ؟ އޭރުންވެސް ލާރި ލިބޭނީ ރައްޔިތުންގެ އަތުން ވިއްޔާއެވެ.

ރާއްޖޭގެ ނެތްވަރުގެ މަހުޖަނުން ކަމަށްވާ މީދޫ ދާއިރާގެ މެމްބަރު އަހުމަދު ސިޔާމް މުހައްމަދު (ސަން ޓުރެވަލް ސިޔާމު) އާއި މާމިގިލި ދާއިރާގެ މެމްބަރު ގާސިމް އިބްރާހިމް (ބުރުމާ ގާސިމު) ވެސް ރައްޔިތުން ފެލާލަން ވޯޓުދިނެވެ. ލިބޭ އެއްޗަކުން ހަމަ ދެކޮޅު ނުޖެހެނީ ދެއްތޯއެވެ؟ ނާޖާއިރުގޮތުގައި ވެރިކޮށްލައިގެން އުޅޭ ރިސޯޓުތައް އަލުން ބިޑަށް ހުށައަޅަން ގެންނާށެވެ. އޭގެން ލިބޭ ފައިސާއިން ދެވެރިންނަށް މަހަކު 82،000 (އައްޑިހަ ދެހާސް) ރުފިޔާގެ މުސާރައެއް ދެވިދާނެއެވެ. މިހާރު ތިޔާގެ ދެވެރިންނަށް ރިސޯޓުތައް ދީގެން ރައްޔިތުންގެ ހަޒާނާއަށް ލިބެންވާ ވަރާ ގާތަށްވެސް ޑޮލަރެއް ނުލިބެއެވެ.

މައުލޫމާތު ނެގީ: ދިވެހިޕޯސްޓް އިންނާއި ރައްޔިތުންގެ މަޖިލީހުގެ ސައިޓުން

މައުމޫނުގެ ތާއީދު އިތުރުވަނީ ކީއްވެ؟

މައުމޫނުގެ 30 އަހަރުގެ ވެރިކަން ބަދަލުކޮށްލީ ފޮނި ހުވަފެންތަކެއް ދުށުމުގެ އުންމީދުގައެވެ. އެހެން ދުވަސްތަކެއް ދުށުމަށެވެ. އެހާރަށްވުރެ ފާގަތި، އަދުލުވެރި، ތިޔާގި، ހަމަހަމަ، ކޮރަޕްސަނުން މިންޖުވެފައިވާ، ކުށްތައް މަދުކުރެވިފައިވާ އަމާން ރާއްޖެއެއްގެ އުއްމީދުގައެވެ. އަންނަން އޮތް ޖީލުތަކުގެ ހައްގުގައެވެ. ނަމަވެސް، ރައްޔިތުމީހާއަށް މިއަދު ފެންނަނީ ...

*************

ގައުމުގެ އިގުތިސާދު:

ކޮރަޕްސަނަކީ އިގުތިސާދުގެ ކަތުރުފަނިކަމަށް ބުނެވޭއިރު، ކޮރަޕްސަން ނައްތާލުމަށް މިސަރުކާރުން މަސައްކަތެއް ކުރާ ތަނެއް ނުފެނެއެވެ. އަބަދުވެސް ފެންނަނީ ތިމާމެންގެ ބޮޑި ބޮޑުކުރާން އުޅޭ މަންޒަރެވެ. (ކޮރަޕްސަން އިތުރުވެއްޖެކަމަށް ޓްރާންސްޕޭރަންސީ އިންޓަނޭޝަލުން އެންމެ ފަހުން ޝާއިރުކުރި ރިޕޯޓު ބުނެއެވެ.)

ތަކެތީގެ އަގުތައް ބޮޑުވެއްޖެއެވެ. ޑޮލަރުގެ މައްސަލައަށް ހައްލެއް ހޯދައެއް ނުދެވުނެވެ. ބޭސް ފަރުވާއަށް ރާއްޖޭން ބޭރަށް ދާން އުދަގޫވެއްޖެއެވެ. ހައްޖަށް ނުގޮސް މަޑުކޮށްލާން ޖެހިއްޖެއެވެ. ކަންމަތީ ފިހާރައިގެ ދަރަނިތައް ކަނޑައެއް ނުދެވުނެވެ. ތަންތަނުގެ ކުލި އަދިވެސް އަންނަނީ އުފުލެމުންނެވެ. ހިލޭ ބޭސްކުރެވެން ފެށުނުއިރު ޑަކުޓަރުންނެއް ނެތެވެ. ބޭސްކޮޅު ހުސްވެއްޖެއެވެ.

ގައުމުގެ ހަޒާނާއިން ނެގިކަމަށް ބުނި ފައިސާ ހޯދައެއް ނުދެވުނެވެ. ގައުމަށް އިތުރު އާއްމުދަނީ ލިބޭނެ ދޮރެއް ހުޅުވައެއް ނުދެވުނެވެ. މަސްވެރިކަން ތަރައްގީއެއް ނުކޮށްދެވުނެވެ. ކުރިން ފައިސާ ޗާޕުކުރިއިރު، މިހާރު ނަގަނީ ބޮޑެތި ލޯނުތަކެވެ. (މިސަރުކާރުން ގަންނަ ޓީ-ބިލަކީ ބޭރުން ލިބޭ ލޯނަށްވުރެ ބޮޑު އެއްޗެއް ރައްޔިތުމީހާ ބެންކުތަކަށް ދައްކަންޖެހޭ "ފަލަ" ލޯނެކެވެ.) ހިލޭ އެހީ އާއި ބޭރުން ލިބޭ ވަރުވަރުގެ އެހީތައް މަދުވެއްޖެއެވެ. ދެއްކެނީ ހުސް ހޮޅި ވާހަކައެވެ. ބޭރަށް ކުރާ ދަތުރުތަކުން ވެރިމީހާއަށް ލިބޭ މެޑެއްޔެއްގެ އިތުރުން ގައުމަށް ލިބޭ އެއްޗެއް ނުފެނެއެވެ. ކުރު މުއްދަތުގެ އާއްމުދަނީގެ ބޭނުމުގައި ވިއްކަންލާ ތަން ފެންނަނީ ގައުމުގެ ހަރު މުދަލެވެ.

ސަރުކާރުގެ ހިންގުން:

ސިޔާސީ މަގާމުތައް އިތުރުވެއްޖެއެވެ. ކަންކަން ކުރެވޭ ނަތީޖާ ނެރެވޭފަދަ މީހުންނެއް ނުފެނެއެވެ. ނުކަތާވަރަކަށް ސްޓޭޓު މިނިސްޓަރުންނާއި އެޑުވައިޒަރުން އިތުރުކޮށް ގައުމުގެ ހަޒާނާ ހުސްވެއްޖެކަން އިހުސާސް ވާން ފަށައިފިއެވެ. މަރިޔާ ދީދީމެންގޭ އެންމެނަށް ބޮޑެތި ވަޒީފާތައް ދީ، ރައްޔިތުން ބޭނުން ނެތިގެން ގެއްލާލާ މީހުންގެ ބަދަލު އަރައިގެން އުޅޭތަން ފެނެއެވެ. ކުރީގެ ސަރުކާރުގެ ހިންގުމެކޭ ވަކި ތަފާތެއް ނުފެނެއެވެ. ހަލުވިއެއް، ދުވެއްޔެއް ބާރެއް ނޫނެވެ. ގައުމުގެ ކަންތައްތައް ރަނގަޅުކުރަން ކުރިން ދެއްކި ވާހަކަތައް ހުއްޓައި، އެކަންތައްތައް ރަނގަޅުކުރުމަށް ބިލުތައް ހަދައި މަޖިލީހަށް ހުށައަޅާ ތަނެއް ނުފެއެވެ. މީހުން ބިނާކޮށް، ސަރުކާރުގެ ގިޔަރު ބާރުކުރެވެތޯ ކުރާ ކަމެއް ނުފެނެއެވެ. (ކުރެވޭ ކަމަކީ އިންޖީނުގެ ބުރުތައް ރުޅިއެރުވުމެވެ.) ގަވާއިދުތައް އިސްލާހުކޮށް، ހަރުދަނާ ސިޔާސަތުތަކެއް ހަދަމުން ގެންދާތަނެއް ނުފެނެއެވެ. އިވެނީ ހުސް ވާހަކަތަކެކެވެ. ގައުމު ހިންގަން ތިބިތަން ފެންނަނީ ކުރިންވެސް ތިބި ކަހަލަ މަރުމޯލުންނާއި (އަސްލަމް ޝާކިރުމެން ކަހަލަ) ރޯނު އެދުރުންނެވެ.

ތައުލީމު:

ތައުލީމުގެ ނިޒާމު ރަގަޅުކުރުމުގެ ބަދަލުގައި ފެންނަނީ ތައުލީމުގެ ނިޒާމުގެ ތެރެއިން ދިވެހިން މަރު ދަންޖެހޭ އިސްލާމުދީން ބޭރުކުރަން ގަދައަޅާ ކުރާ މަސައްކަތެވެ. އިސްކޫލުތަކަށް ޓީޗަރުން ހަމައެއް ނުކޮށްދެވުނެވެ. ތަކެތި ހަމައެއް ނުކޮށްދެވުނެވެ. މުގައްރަރުތައް އިސްލާހުކޮށް، ޒަމާނީ ތައުލީމާ ދިމާލަށް ގައުމުގެ މިސްރާބު އަބުރައެއް ނުލެވުނެވެ. މައްސަލަތައް ހައްލުކުރުމުގެ ބަދަލުގައި އުޅެނީ މައްސަލަތައް އުފަން ކުރެވޭނެ ކަންތައްތައް ކުރާށެވެ. ވެއްޓެމުންދާ އަމީނިއްޔާގެ އިމާރާތަށް ޕުރައިމެރީ ގުރޭޑުގެ ކުޑަކުދިން ވެއްދުމާއި ދެޖިންސުގެ ކުދިން އެއްކުރުމެވެ. ކުދިން ޝައުގުވެރި ނުވާ، ޒަމާނާ ނުގުޅޭ މުގައްރަރުތައް އިސްލާހުކުރުމުގެ ބަދަލުގައި މާއްދާތަކާއި (ސީއެޗް އެސްސީގެ އިސްލާމާއި ދިވެހި ފަދަ) މުގައްރަރުތައް އުވާލާށެވެ.

އަދުލު އިންސާފު:

މަސްތުވާ ތަކެތިން މިޖީލު ސަލާމަތްކުރެވޭތޯ ކުރާ މަސައްކަތެއް ނުފެނެއެވެ. އެބުނާ ޑުރަގުގެ 6 ބޮޑުންނެއް ހިފާ ހައްޔަރެއް ނުކުރެވުނެވެ. ގުރޫޕު މާރާމާރީ ހުއްޓުވައި، މާލޭ އަމާންތަނަކަށް ހަދައެއް ނުދެވުނެވެ. ފުލުހުންގެ ގާނޫނު ފާސްވެ، ސަރުކާރުގެ ހުރިހާ ބާރުތަކެއް ލިބިފައިވާ އިރުވެސް، މިގައުމުން ކުށް މަދެއް ނުކޮށްދެވުނެވެ. ކުށްވެރިންނާމެދު އިއްވާ ނިޔާތަކެއް ތަންފީޒެއް ނުކޮށްދެވެއެވެ. މަޖިލީހުގެ އަގުލަބިއްޔަތު ނެތޭ ބުނާއިރު، ދެބައިމީހުން އެއްބަސް ކިޔާގެން އެކުވެރިކަމާއެކު އަވަސް އަވަހަށް ނިންމާލާ ކަންތައްތައް އެބަ ފެނެއެވެ. އަދުލު އިންސާފު ހަރުދަނާކުރަން ބަންޑާރަނައިބު އުޅޭ ތަނެއް ނުފެނެއެވެ. ރައްޔިތުން ބޭނުންވާ ކަންތައްތަކަކީ ކޮބައިކަމެއް އެގޭހެއްނެއް ހިޔެއް ނުވެއެވެ.

*****************

ސަރުކާރުގެ ބޮޑުން ގަބޫލު ނުކުރުން އެއީ އެހެން ކަމެކެވެ. އެހެންގޮތަކަށް ސަރުކާރުގެ ވެރިން މިކަމުގައި ދުށުމަކުން ރައްޔިތުމީހާގެ ވިސްނުމެއް، ފެންނަ ކަންތައްތަކެއް އޮޅުވައެއް ނުލެވޭނެއެވެ. ވިސްނައިދޭން އުޅޭ މީހާގެ ވިސްނުން ބަދަލު ނުކުރާ ހިނދެއްގައެވެ. މިސާލަކަށް، އަރަބިއްޔާގެ މައްސަލައަކީ ދީނީ މައްސަލައެއް ނޫނޭ ކިތައްމެ ވަރަކަށް ރައީސް ނަޝީދު ބުނެދެން އުޅުނަސް ރައްޔިތުމީހާ އެވާހަކައެއް ނާހާނެއެވެ. އެކަން ގަބޫލުކުރާނީ ދީނެއް މިއްލަތެއް ގަބޫލު ނުކުރާ ދެތިން މީހެކެވެ. މިހާތަނަށް ކަން ވެފައި އޮތީ އެހެންނެވެ. ރައްޔިތުމީހާ އިތުރަށް ރުޅިއަރުވަން ބޭނުމިއްޔާ އެފަދަ ކޮސް ގޮވަމުން ގެންދާށެވެ. އޭރުން ފައިން އެ އެރޭނީ ކެނެރީގޭ ނަޝީދު ބުނާހެން ތިމާގެ އަމިއްލަ އެއްޗަށެވެ. ބޭލޭނީ ތިމާގެ ސޯޓެވެ.

ދެއިރު ދެދަޅައަށް މިވާހަކަތައް ރައްޔިތުމީހާ ނުދެއްކިޔަސް ރައްޔިތުމީހާއަށް ފެންނަނީ ކުރިން ބުނި މަންޒަރެވެ. މިސަރުކާރުގެ ތާއީދު ގެއްލި، މައުމޫނުގެ ތާއީދު އިތުރުވަނީ ކުރެވޭ މާޔޫސްކަމުގެ ބޮޑުކަމުންނެވެ. މިސަރުކާރު ގެންނަން މަސައްކަތްކުރި މީހުން ވެސް މިސަރުކާރާ ދުރަށް ދާތީވެއެވެ. ނަފުރަތު ކުރަން ފެށުމުންނެވެ. ރައީސް ނަޝީދު މައުމޫނު ދެކެ ބިރު ގަންނަނީވެސް މިކަން ކޮންމެވެސް ވަރަކަށް ގަބޫލުކުރެވޭތީވެއެވެ. ފުރިފައި ހުރި އެއްޗެއް ގުޑުގުޑެއް ނާޅާނޭ ބުނާ ފަދައިން، ރައްޔިތުން އެދޭގޮތަށް ވެރިކަން ކުރާ، ރައްޔިތުން ރުހޭ ވެރިޔަކު ބިރުގަނެ ޖެހިލުންވާން ޖެހޭ ސަބަބެއް ނެތެވެ. ހާއްސަކޮށް އެބުނާ ނާގާބިލު، ކޮރަޕްޓުވެފައިހުރި، ގައުމުގެ ހަޒާނާ ކާލައިގެން ހުރި ކުރީގެ ރައީސް ދެކެއެވެ.

ނޯޓު: މިހާރު ތިޔަ ދަނީ އަތްބައިގެ ގަޑުތައް ހުސްވަމުންނެވެ. ބޮޑު މުސާރަ ލިބޭ އެޑުވައިޒަރެއް ނޫނަސް އިހުލާސްތެރި ލަފައެއް ދީފާނަމެވެ. opposeanni@gmail.com އަށް އީމޭލުކޮށްލާށެވެ. މިލިޔުން އެހެން ސައިޓެއްގައި ޖެހުމަކަށް އަޅުގަނޑު އިއުތިރާޒެއް ނުކުރަމެވެ.

ބަލަންވީ ސިޔާސަތަށް، މޫނަކަށް ނޫން

ނިއުމަތުﷲ އިދުރީސް، ހަވިރުނޫސް

މީހުންނަށް ތާއީދުކުރުމުގެ ވާހަކަ ދައްކާ ނަމަ އެންމެ ފުރަތަމަ ވެސް ވަންނަން ޖެހެނީ ސިޔާސީ ފިކުރުގެ ތެރެއަށެވެ. ސިޔާސީ ލީޑަރުންނާއި ސިޔާސީ ޝަހްސިއްޔަތުތަކުގެ ވާހަކަ ދައްކަން ޖެހެ އެވެ. އެ މީހުންނަށް ތާއީދުކުރާ މީހުން ކަންކުރާ ގޮތުގެ ވާހަކަ ވެސް ދައްކަން ޖެހެ އެވެ.

ސިޔާސީ ލީޑަރުން އަބަދުވެސް ވައުދު ވަނީ ގައުމަށް ހިދުމަތް ކުރުމަށެވެ. ރައްޔިތުންނަށް ފާގަތިކަން ހޯދައިދިނުމަށެވެ. އެ ވައުދު ފުއްދުމަށް އެކި ލީޑަރުން މަސައްކަތްކުރައްވާނީ އެކި ގޮތަށެވެ. އެކި ސިޔާސަތުގެ މައްޗަށެވެ. އެ ލީޑަރަކަށް އެންމެ ރަނގަޅު ކަމަށް ވިސްނިވަޑައިގަންނަވާ ސިޔާސަތެއްގެ މައްޗަށެވެ. އެ ސިޔާސަތު ކަމުނުގޮސް، ބައެއް ފަހަރު ގެއްލުން ލިބެ އެވެ. ފައިދާ ވެސް ކުރެ އެވެ. އެކި ފަހަރު އެކި މިންވަރަށެވެ.

ސިޔާސީ ލީޑަރެއްގެ މޮޅު ކަމަކީ ގެންގުޅުއްވާ ސިޔާސަތަކުން ނަތީޖާ ނެރުމެވެ. ޖުމްލަ ގޮތެއްގައި ގައުމުގެ ހުރިހާ ދިމާލަކަށް ފައިދާ ބެހިގެން ދާނެ ގޮތް ހެދުމެވެ. އެކަން ނުކުރެއްވޭ ނަމަ ބޭނުމެއް ނެތެވެ. ނަމަވެސް މައްސަލައަކަށް ވަނީ ސިޔާސަތު އޮތް ތަނުގައި އޮއްވައި، ސީދާ މީހާއަށް ތާއީދުކުރެވޭތީ އެވެ. ވަކި ޕާޓީއަކަށް ވާތީ ތާއީދުކުރާތީ އެވެ. ހަމަ އާއި އިންސާފު ކޮންމެ ގޮތަކަށް އޮތް ނަމަވެސް، ތިމާ ހިތް އެދޭ މީހާ ބުނާ ކޮންމެ ބަހެއް އަހައި، އެހެން ގޮތަކަށް ވިސްނަން ވެސް ބޭނުން ނުވުމެވެ.

ރާއްޖޭގެ ވާހަކަ ބާއްވާފައި މިސާލެއް ނަގާނީ ވަރަށް ދުރުން، އައިވަރީ ކޯސްޓުންނެވެ. ދާހިލީ ހަނގުރާމަ އަށް ފަހު ބޭއްވި ފުރަތަމަ ރިއާސީ އިންތިހާބުގައި އިދިކޮޅު ލީޑަރު ކާމިޔާބު ހޯއްދެވި ކަމަށް އިލެކްޝަންސް ކޮމިޝަނުން ނިންމި އެވެ. ނަމަވެސް ވެރިކަމުގެ ފަރާތުން ނިންމީ އިންތިހާބުގެ ނަތީޖާ ސައްހަ ނޫން ކަމަށާއި ވެރިކަން ދޫކޮށްނުލުމަށެވެ. ބޭރުން އައި އޮބްޒާވަރުން ވެސް ބުނަނީ އިންތިހާބުގެ ތެރޭގައި ކުދިކުދި މައްސަލަތަކެއް ހުރި ނަމަވެސް ނަތީޖާ ބަދަލުވާ ފަދަ ކަމެއް ހިނގާފައި ނެތް ކަމަށެވެ. އެހެންވި ވިޔަސް ރައީސްގެ ސަޕޯޓަރުން ރައީސްގެ ބަސް ގަބޫލުކޮށް، އިދިކޮޅު މީހުން ބިރު ގަންނަވަން ފެށީ އެވެ. އެންމެ ފަހުން މިހާރު އެ "ދެ ރައީސް" އެ ބޭފުޅެއްގެ ގޮތުގައި "ސަރުކާރެއް" ހިންގަން ފެށީ އެވެ. ވެރިކަމުގެ އާރާއީ ބާރަށް ބަޔަކު ކުރަމުންދާ މަސައްކަތުގައި ހަމަޔާއި އިންސާފުން އެއްކިބާވެގެން ތިބި ނަމަވެސް "ވިދާޅުވި ގޮތެއް" ގަބޫލުކޮށްގެން ތިބި ރައްޔިތުން ނިކުމެ ހަމަނުޖެހުން ހިންގަނީ އެވެ. މަރުވެގެން ދަނީ ވެރިކަމާ ހެދި އުޅޭ މީހުންނެއް ނޫނެވެ. ނިކަމެތި ރައްޔިތުންނެވެ. ވެރިންގެ ފަރާތުން ހިމާޔަތާއި ރައްކާތެރިކަމަށް އެދިގެން ތިބި އާންމުން މަރުވެގެން އެ ދަނީ ވެރިންގެ އަމިއްލަ އެދުން ނޫން އެހެން ކަމަކާ ހެދިއެއް ނޫނެވެ.

މި ކަންތައްގަނޑަށް ބަލާއިރު ރައްޔިތުންނަށް އަނިޔާ ލިބެމުން ދިއުމުގެ އެންމެ ބޮޑު ސަބަބަކީ މީހާއަށް ތާއީދުކުރުމެވެ. ރައީސް ކޮންމެ ގޮތަކަށް ކަންތައް ކުރެއްވި ނަމަވެސް އެއީ އެންމެ މޮޅު އަދި އިންސާފުވެރި ގޮތް ކަމަށް ގަބޫލުކޮށްގެން އެކަމުގެ ދިފާއުގައި ބަޔަކު މަގުމައްޗަށް ނިކުތުމެވެ. ހަމައިން ބޭރުގައި ކަންކުރާ ސިޔާސީ ލީޑަރުންގެ ފަހަތުގައި ނުތިބެ، އަމިއްލަ ސިކުނޑިން ވިސްނައިގެން ހިނގަމުންދާ ނަމަ އަމާންކަން ގެއްލި ލޭ އޮހޮރުވަންތަކާ ހިސާބަށް ދިއުމުގެ ނުރައްކާ އެތައް ގުނައަކަށް ކުޑަވެގެން ދާނެ ކަމާ މެދު އެއްވެސް ސުވާލެއް ނެތެވެ. މިއަދު ހުރިހާ ވެސް މައްސަލަ އަކީ ވަކި މީހަކު ބުނީތީ އެ ބުނި ގޮތެއް އެއީ އެންމެ މޮޅު ގޮތް ކަމުގައި ބަލައިގަނެގެން ތިބުމެވެ.

އެ މީހަކަށް ގަބޫލުކުރެވޭ އެންމެ ރަނގަޅު ސިޔާސަތެއް ގެންގުޅޭ ފަރާތަކަށް ތާއީދު ކުރުމަކީ ކުށެއް ނޫނެވެ. މައްސަލައެއް ވެސް ނޫނެވެ. އެކަމަކު ކިތަންމެ ރަނގަޅު ސިޔާސަތެއް ގެންގުޅޭ މީހާ ވެސް ގޯސް ގޮތަކަށް ކަންތައް ކޮށްފާނެ އެވެ. މައްސަލައަކަށް ވެގެން މި އުޅެނީ އެ ހަގީގަތް ގަބޫލުކުރަން ބޭނުން ނުވާތީ އެވެ. ނުވަތަ ހަގީގަތް ގަބޫލުކުރެވުނު ކަމުގައި ވިޔަސް ގޮތް ދޫކުރަން ބޭނުން ނުވާތީ އެވެ.

މީހުންނަށް ގޮތް ހުސްވުމުގެ ބަދަލުގައި، ކޮންމެ މީހަކަށް ވިޔަސް އެ މީހަކު ކުރާ ރަނގަޅު ކަމެއް ބަލައިގަނެ ގޯސް ކަންކަމަށް ދެކޮޅު ހެދުން މާ ބުއްދިވެރި އެވެ. ބަލަންވީ މޫނަކަށް ނޫނެވެ. ކުރާ ކަންކަމަށެވެ.

ރައްޔިތުންގެ ލޭބޯ މަޖިލީހާ ދެކޮޅަށް މުޒާހަރާކޮށްފި

މަޖިލީހުގެ މެމްބަރުންގެ މުސާރަ ބޮޑުކުރި މައްސަލައިގައި ރައްޔިތުންގެ މަޖްލީސް ކައިރިއަށް ގިނަޢަދަދެއްގެ ބަޔަކު އެއްވެ މުޒާހަރާ ކޮށްފިއެވެ. މުޒާހަރާ ކުރި މީހުން ގޮވާލީ މަޖްލީސް އުވާލުމަށާއި މަޖްލީހުގެ މެންބަރުން އިސްތިޢުފާދިނުމަށެވެ. އަޑުގަދަކުރާއާއި، ބެނާތަކާއި، ބޯޑުތައް ހިފައިގެން ރައްޔިތުންނަށް އެއްވެސް ފައިދާ ހުރި މަސައްކަތެއް މަޖިލީހުން ނުކުރާ ކަމަށް ބުނެ ނުރުހުން ފާޅުކުރިއެވެ. އަދި މެމްބަރުންނަށް އިތުރަށް ފައިސާ ހޯދައިދިނުމަށްޓަކައި، މަޖްލީސް ކުރިމަތީ ފަންޑު ފޮށްޓެއް ބަހައްޓައި މުޒާހަރާ ކުރަމުން ދާ މީހުން އެއަށް ލާރި އަޅާފައިވެއެވެ.

މުޅި އަހަރު ނިޒާމީ ނުކުތާ ނަންގަވައިގެން 82،500 ރުފިޔާ ހޯއްދެއްވިކަމަށް މުޒާހަރާގައި ބައިވެރިވި މަދަނީ ޖަމިއްޔާތައް ކަމުގައިވާ ޓްރާންސްޕޭރެންސީ މޯލްޑިވްސް އާއި ޑިމޮކްރެސީ ނެޓްވޯކްއިން ތުހުމަތުކުރިއެވެ. ދައުލަތުގެ މުވައްޒަފުން (ސިލިވްސާވަންޓުން) ގިނަ އަދަދަކަށް ހިމެނޭ މިމުޒާހަރާގައި އެމީހުންގެ މުސާރަ ބޮޑު ނުކޮށް މަޖިލީހުގެ މެމްބަރުންގެ މުސާރަ ބޮޑުނުކުރުމަށް ގޮވާލިއެވެ. ވަކި ގުރޫޕެއް ހަދައިގެން އައިސް، ޖޫޑިޝަލް ސަރވިސް ކޮމިޝަނަށް ރައީސް ނަޝީދު އައްޔަނުކުރައްވާފައިވާ މެންބަރު އައިސަތު ވެލެޒިނީ ރައްޔިތުންގެ މަޖިލިސް އުވާލުމަށް ގޮވާލިއެވެ. ރައްޔިތުންގެ މަޖިލީހަށް ހުށައަޅާފައިވާ ޖޫޑިޝަލް ސަރވިސް ކޮމިޝަނުގެ މައްސަލަތަކެއް ނުބަލާކަމަށް ތުހުމަތުކޮށްފައެވެ.

މާވަށު ދާއިރާގެ މެންބަރު އަބްދުލްއަޒީޒު ޖަމާލު އަބޫބަކުރާ ހިފަހައްޓަން މަސައްކަތްކުރުމާއި ކުޑަ ހުވަދޫ ދާއިރާގެ މެންބަރު އާމިރު އާއި އިތުރު މެންބަރެއްގެ ދަތްދޮޅި ދަށަށް މުޒާހަޜާގެ ބައިވެރިން ވަނީ އަތްލާފައެވެ. މުޒާހަރާގެ ބައިވެރިންގެ ތެރޭގައި ހިމެނޭ ބައެއް އެމްޑީޕީ މެންބަރުން ވެސް ވަނީ ހުޅުހެންވޭރު ދާއިރާގެ މެންބަރު ރީކޯ މޫސާމަނިކުގެ ވެސް އިސްތިއުފާއަށް ގޮވާފައެވެ. މައްޗަންގޮޅި އުތުރު ދާއިރާގެ މެންބަރު އަދި އެމްޑީޕީގެ ޗެއަރޕަރސަން މާރިޔާ އަހުމަދު ދީދީ މުޒާހަރާގެ ބައިވެރިންނާ ބައްދަލުކުރައްވައި މެމްބަރުންގެ މުސާރައިގެ އަދަދުތައް ސާފުކޮށްދެއްވިއެވެ. މިއެއްމެންވަނީ ރައްޔިތުންގެ ފެލާލައިގެން ތިމާމެންގެ ބޮޑިވަރު އިތުރުކުރުމަށް ވޯޓުދީފައެވެ.

އަހަރެމެން ރައީސް ނަޝީދަށް ގޮވާލަނީ ރައްޔިތުންގެ މަޖިލީސް އުވާލުމަށް ރައްޔިތުންގެ ފެންނަ ނުފެންނަ ވޯޓެއް ނެގުމަށެވެ. ހާއްސަ ހާލަތުގައި ރައްޔިތުންނަށް ފެންނަގޮތް ރައްޔިތުންގެ ކިބައިން ހޯދުމަށްޓަކައި ގާނޫނު އަސާސީ ބުނާތީވެއެވެ. މިފަދަ ވޯޓެއް ލޯކަލް އިންތިހާބުގެ ތެރެއިން ގެންދާނަމަ އިތުރު ހަރަދުތަކެއްވެސް ނުހިގާނެއެވެ. މީގެ އިތުރުން، ދައުލަތުގެ މުސާރައިގެ ތަފާތުތައް ނައްތާލައި، ދައުލަތުގެ އާއްމުދަނީއަށް ބަލައިގެން މުސާރަތައް ތަރުތީބުކުރުމުގެ ގޮތުންނާއި، މަޖިލީހާއި މިނިވަން މުވައްސަސާތަކުގެ މުސާރަތައް އަމިއްލައަށް ކަޑައެޅުމުން ނުކުންނަ މައްސަލަތައް ހައްލުކުރުމުގެ ގޮތުން ދައުލަތުގެ މުސާރަތަކާބެހޭ ކޮމިޝަނާ ބެހޭ ބިލެއް މަޖިލީހަށް ހުށައެޅުމަށް ބަންޑާރަ ނައިބަށް ގޮވާލަމެވެ.

ރައްޔިތުންގެ މަޖިލީސް އުވާލަން ޖެހެނީ

ހ. މެމްބަރުންގެ ޒިންމާ ހެޔޮގޮތުގައި ނުއުފުލާތީވެ މާލީގޮތުން ރައްޔިތުންނަށް ދަތިވުން

ށ. ސަރުކާރު ޒިންމާދާރު ކުރުވުމުގެ ނަމުގައި ސަރުކާރު ހިންގުމުގެ ބާރަށް ހުރަސްއެޅުން. އެގޮތުން، އެންމެ ފާހަގަކުރެވޭ ކަމަކީ ދައުލަތުގެ ބަޖެޓު ދިރާސާކުރުމުގެ ބަދަލުގައި ތިމާމެންގެ އަމިއްލަ މުސާރަބޮޑު ކުރުމަށް ފާސްކުރުމެވެ. އިތުރު ކުރި 200 މިލައަން ރުފިޔާގެ ސަބަބުން ސަރުކާރަށް މާލީގޮތުން ދަތިތަކާ ކުރިމަތިލާން ޖެހޭނެއެވެ.

ނ. ގާނޫނުތައް ފާސްކުރުމުގައި ރައްޔިތުންގެ މަސްލަހަތު ހަދުމަނެތިކޮށް، ތިމާމެންގެ އަމިއްލަ މަސްލަހަތު އިސްކުރުން. އޭގެ ތެރޭގައި ދައުލަތަށް (ރައްޔިތުންނަށް) ލިބެންޖެހޭ އާއްމުދަނީ ކަމަށްވާ (ޓެކުސް ނުދައްކާ އަގުބޮޑު ކާރުތައް ގަނެގެން) އިންޕޯޓު ޓެކުހުން ރެކެން މަސައްކަތްކުރުމާއި، ދައުލަތުގައި ފައިސާ ނެތްއިރު ރައްޔިތުން އިތުރަށް ފެލާލުމުގެ ގޮތުން ރައްޔިތުންގެ ރުހުމާ ދެކޮޅަށް ދައުލަތުގެ ހަޒާނާއިން ލާރި ނަގަން މަސައްކަތްކުރުމެވެ.