އެމް.ޑީ.ޕީ އެވަނީ ރަހީނު ކުރެވިފައެވެ.

އެމް.ޑީ.ޕީއަކީ ދިވެހިރައްޔިތުންގެ ޑިމޮކުރަޓިކު ޕާޓީއެވެ. 30 އަހަރަށް ދިގުލައިގެން ދިޔަ މައުމޫނުގެ ވެރިކަން ނިމުމަކަށް ގެނެސް، ރާއްޖޭއަށް ޑިމޮކުރަސީ ގެނައުމަށް އުފެއްދުނު ފުރަތަމަ ސިޔާސީ ޕާޓީއެވެ. އެހެންކަމުން އެމް.ޑީ.ޕީ ބެލެވިފައިވަނީ އިސްލާހީ މަސައްކަތުގެ ޒަމްރެއްކަމުގައެވެ. ބުރޭންޑުކަމުގައެވެ. ނަމަވެސް، މިބުރޭންޑު މިއަދު މިއަންނަނީ އަވަސް ސުޕީޑެއްގައި ފަޑުވެ، މީހުން ނަފުރަތު ކުރާ އެއްޗަކަށް ވަމުންނެވެ. ސަބަބަކީ، އެމް.ޑީ.ޕީ އެވަނީ ހައިޖެކު ކުރެވިފައެވެ. ޑިމޮކުރަސީގެ އުސޫލުތައް ނައްތާލާފައެވެ.

އާއެކެވެ. އެމް.ޑީ.ޕީ އެވަނީ ރަގަޅަށްވެސް ބަޔަކު މީހުން އެމީހުންގެ ބޭނުމަށް ޓަކައި ރަހީނުކޮށްފައެވެ. އަމިއްލަ މަންފާތަކަކާއި މަސްލަހަތުތަކެއް ހިމާޔަތްކުރުމަށެވެ. ޑިމޮކުރަސީގެ އުސޫލުތައް ނައްތާލައި، ޕާޓީގެ އަސާސީ ގަވާއިދާއި އަމަލުކުރަމުން އައި އުސޫލުތަކާ ހިލާފަށެވެ. ބޭނުމަކީ ތިމާމެންގެ އަމިއްލަ މަސްލަހަތު ރައްކާތެރިކޮށްދޭ ވަސީލަތެއްގެ ގޮތުގައި ޕާޓީ ބޭއްވުމެވެ. މިކަން ވަރަށް ހާމަކަން ބޮޑު ގޮތަކަށް ފެންނަން އެބައޮތެވެ.

ޕާޓީގައި ވަގުތީ ރައީސެއް ހުންނަތާ އަހަރުތަކެއް ފާއިތުވެގެން ދަނީއެވެ. ޕާޓީގެ ތެރޭގެ އިންތިހާބުތައް ނުބާއްވާ ދިގު ދަންމަނީއެވެ. ޕާޓީގެ ގުނަވަންތަކުގެ ބާރު ކަޑުވާލުމުގެ ގޮތުންނެވެ. ކެނެރީގޭ ނަޝީދާއި މާރިޔާ ދީދީ އާއި އޮންނަ ގުޅުމަކީ އަޑި ނޭގޭ ގުޅުމެކެވެ. ޗެއާޕާސަންކަމަށް ދެން ފަހަރަކުން ކުރިމަތި ނުލާނެކަމަށް ބުނުމާއެކު ޕާޓީގެ މުހިއްމު މަގާމުތަކުގެ އިންތިހާބު ފަސްކުރެވިއްޖެއެވެ. ބޭނުމަކީ ޗެއާޕާސަންކަމުގައި މާރިޔާ ބަހެއްޓުމެވެ. މާރިޔާއަކީ ނަޝީދު މާ ރުހޭ މީހެކޯލައެވެ.

ވެލާނާގެއިން ކަރުދާންތަކެއް ނެގި މައްސަލާގައި ކެނެރީގޭ ނަޝީދަކީ ވަގެކޭ ކިޔައިގެން ކޯޓަށް މައްސަލަ ހުށައެޅީ މިމާރިޔާއެވެ. ބީބީސީ އަށް އަރައިގެން ދިވެހިރާއްޖެ ޑިމޮކުރަސީއަކަށް ފައްކަލެއް ނޫނޭ އެތިވަރު ކިޔައީވެސް ހަމަ އެމާރިޔާއެވެ. ދެން އެމާރިޔާ ނަޝީދަށް މާކަމުދާ މީހަކަށް ވީގޮތަކީ އަރަތެކެވެ. ތިމާގެ ކިބައިގައި ހިންގުންތެރިކަމެއް ހުރިޔަކީ ނޫނެވެ. އެމްޑީޕީގެ އެތެރޭގެ ޑިމޮކުރަސީ ހަރުދަނާކޮށް ޕާޓީގެ ހިންގުން ހަރުދަނާކުރަން ކުރެވުނު ކަމެއް ނެތެވެ. މަރިޔާގެ މޭސްތިރިކަމުގައި ރައްޔިތުންގެ މަޖިލީހުގެ އިންތިހާބުގައި ޕާޓީވަނީ ނާކާމިޔާބާ ކުރިމަތިލާފައެވެ.

މިއަދު ސަރުކާރުގެ ސިޔާސަތަކީ އިސްލާމުދީނުގެ ނޫރު ފޮހެލުމެވެ. އެމްޑީޕީގެ އަސާސީ ގަވާއިދުގައި އިސްލާމުދީން ހިމާޔަތްކުރާނެ ވާހަކަ ބުނެފައި ވަނިކޮށެވެ. މިކަމުގެ މޭސްތިރިންނަކީ ރައީސް އޮފީހުގައި ތިބި ލާދީނީ ބައިގަޑެވެ. މީގެ ގިނަމީހުންނަކީ ވަރަށް ފަހުން ޕާޓީއަށް ވަން މީހުންނެވެ. އެމްޑީޕީ އުފެއްދި އަސްލު މަގުސަދުކަމަށްވާ ގައުމު އިސްލާހުކުރުމުގެ މަސައްކަތްކުރާ ތަނެއް ނުފެނެއެވެ. ޑިމޮކުރަސީ ގައުމުގައި ހަރުދަނާކުރުމަށް ކުރިކަމެއްނެތެވެ. އަބަދުވެސް ކޮންމެވެސް އަމިއްލަ ކަންތައް ގަޑެކެވެ. ޕާޓީގެ ހިޔަލުގައެވެ. ޕާޓީގެ މެމްބަރުންނަށް ކަމުގެ ހަގީގީ މަގުސަދުތައް އޮޅުވާލާގެންނެވެ.

ބަޔަކަށް އޮޅިފައި އޮތަސް ހަގީގަތުގައި ޕާޓީގެ ބާނީއަކީ ގޯގޯލަތީފެވެ. ޕާޓީ އުފެދިގެން އައީ އޭނާގެ ހިކުމަތްތެރި ބުރަ މަސައްކަތުންނެވެ. އަންނި ނުވަތަ ކެނެރީގޭ ނަޝީދަކީ އޭނަ ކުރި ބުރަ މަސައްކަތުގެ މޫނެވެ. މާ ގަޓުސް ހުރި މީހަކަށް ވެގެން މީހުންގެ ކުރިމައްޗަށް ނުކުމެގެން އުޅެން ހަދައިގެން މީހުންނަށް އޭނާ ފާހަގަކުރެވުނީއެވެ. ހަގީގަތުގައި އަންނިއަކީ ޑިމޮކުރަސީގެ ވިސްނުމުގެ މީހެއް ނޫނެވެ. ތިމާއަށް ފެންނަގޮތަކީ އެންމެ ރަނގަޅުގޮތް ކަމަށް އަބަދުވެސް ދެކޭ މީހެކެވެ. އެމް.ޑީ.ޕީގެ ޅަފަތުގައި ލީޑަޝިޕްގެ މައްސަލަތައް ދިމާވީ މަސްވަރާގެ އުސޫލު އަންނި ބޭނުންނުވާތީވެއެވެ.

ވެރިކަން ކުރަން ޔާމީނު ވަރަށް ބޭނުން

މައުމޫނުގެ ވެރިކަމުގައި ފަސާދައިގެ ތުހުމަތު އެންމެ ބޮޑަށް ކުރެވުނު އެކަކީ އަބުދުއްލޯ ޔާމީނެވެ. މައުމޫނުގެ ވެރިކަން ގެއްލި ދިޔައީވެސް މިކަލޭގެޔާ ހުރެއެވެ. މައުމޫނު މުސްކުޅިވެ، ގައިބާރު ނިކަމެތިވީ ދުވަހު މިކަލޭގެ ބަލަނީ އެއްގޮތަކުން ނުވަތަ އަނެއް ގޮތަކުން ނަމަވެސް ރާއްޖޭގެ ވެރިކަމަށް އާދޭތޯއެވެ. ޔާމީނު ވެރިކަމައިގެން އުޅޭ ވާހަކަ ކުރިން ނޫސްވެރިން ދައްކަންފެށީގައި އެއީ ދޮގެކޭ ކިޔާ ނޫސް މަޖައްލާތަކަށް އިންޓަވިއުދީ އުޅުނެވެ. ނަމަވެސް، މިހާރު ފާޅުގައި އެހުރީ ނިކުމެވެ. ތިމާގެ ބުރުސޫރަ ރީތިކުރުމަށް ރާއްޖެމިއަދު ޑޮޓް ކޮމް ސައިޓެއް މިހާރު ހިންގައެވެ.

މިއަދު މިވަނީ ޑީއާރުޕީ ތެރޭގައި ގަޑުބަޑު އުފެދިފައެވެ. މިކަންތަކުގެ ތެރޭގައި ޔާމީނު ބުނަނީ "އިދިކޮޅު ކޯލިސަނެއްގެ ލީޑަރެއްގެ ގޮތުގައި ނުކުންނަށް ތިމަން މިހުރީ ތައްޔާރަށޭ" އެވެ. ނޫނީ ތިމަންނައަށް އެފުރުސަތު ދޭށޯލައެވެ. އަޖައިބެއް އަޅެ ނުވާނެހެއްޔެވެ؟ މިކަލޭގެއަށް ކުރެވޭނީ ކޮންކަމެއް ހެއްޔެވެ؟ މިގައުމު އިތުރަށް ހަލާކުކޮށް، ގައުމުގެ ހަޒާނާ ހުސްކުރުން ނޫން ކަމެއް ނުވާނެއެވެ. އޭނަގެ މާޒީއަކީ އެއީއެވެ. "އިކޮނޮމީ" އޭ ގޮވަމުން ދުވާއިރު އިކޮނޮމީ ދެއަތް މައްޗަށްލައިގެން މައުމޫނުގެ ދައުރުގައި ވީކަމެއް ނެތެވެ.

މީނައަށްވުރެ، ހުރިހާ ގޮތަކުން ބެލިޔަސް ސަރުކާރުން ދާދިފަހުން އިސްތިއުފާދިން ޝަހީމު ފަދަ ކަރަޕްސަނާމެދު ތުހުމަތެއް ކުރެވިފައި ނުވާ އައު މީހަކުވެސް މާ ރަގަޅުވާނެއެވެ. ގައިމު ރައްޔިތުންގެ ލޯއްބާއި ތާއީދު އޮންނާނެއެވެ. ހުޅުވާނެ ކަޅު މާޒީއެއް ނޯންނާނެއެވެ. ޔާމީނުގެ ގައިގައި ހުންނަ ފަދަ ބޮޑާކަމާއި ކިބުރުވެރިކަމެއް ގައިމު ނުހުއްނާނެ ވިއްޔާއެވެ.

މުހައްމަދު މުޖުތަބާގެ ވައްކަމާގުޅިގެން އާއްމެއްގެ ޝުއޫރު

"މުހައްމަދު މުޖުތަބާ އާއި ބެހޭ އާޓިކަލް ކިޔާލުމުން އެގެނީ ކޮންއެއްޗެއްތޯއެވެ؟ މިކަމުގައި ލަދުގަންނަންޖެހެނީ ކޮންބައެއްތޯއެވެ؟ މިއީ ދިވެހިން މިއަދު ކޮށްލަންޖެހޭ ސުވާލުތަކެކެވެ. މިއީ ގާނޫނު ހަދާމީހުންނާއި ގާނޫނު ތަންފީޒުކުރާ މީހުންނާއި ފުލުހުންނާއި މައާފުދޭމީހުންނާއި ސަރުކާރުގެ ޒިންމާދާރު ކަމާބެހޭ ފަރާތްތަކުން ވިސްނައި މިހާރުން މިހާރަށް ސަމާލުކަންދީ ބަލަންޖެހޭ ކަމެކެވެ. ރައްޔިތުންނަށް މިފަދަ ހަބަރެއް ގެނެސްދޭއިރު، މިފަދަ ކަމެއް ދިމާވާ ސަބަބާއި ހައްލުކުރާނެގޮތާއި ދޭތެރޭ ވިސްނައި މިފަދަކަމަކުން އާއްމުންނަށް އާއްމުންނަށް ލިބޭ ގެއްލުންތަކާއި އާއްމުން ކުރިމަތިލާ ބިރުވެރިކަން އިހުސާސްވެ މާޔޫސްވުން ނޫންކަމެއް ނުވެއެވެ.

ފުރަތަމަ ކަމަކީ މިއޮއް ކުޑަކުޑަ ރާއްޖޭގައި މުހައްމަދު މުޖުތަބާ ފިލައިގެން އެތަކެއް އަހަރުވާންދެން އާއްމުންގެ ތެރޭގައި އުޅެވޭނެ މަގުތަނަވަސް ވެފައި މިފަދަ ޒަމާނެއްގައި އޮތުމެވެ. ދެވަނަ ކަމަކީ އޭނާ ރާއްޖޭގެ ރަށެއްގައި ފިލައިގެން އާއްމުންގެ މީހެއްގެ ގޮތުގައި ދިރިއުޅުނުއިރުވެސް ކަމާބެހޭ މިޒަމާނުގެ އިންޓެލިޖަންސްއަށް ނޭގިއޮތުމެވެ. ތިންވަނަ ކަމަކީ، މިފަދަ ބޮޑުވަގުންތައް ދޫވެގެން އުޅޭކަން އާއްމުންނަށް އެގޭނެ ނެޓުވޯކެއް ގާއިމުވެފައި ނެތްކަމެކެވެ. މިހުރިހާކަމެއް ކުރުމަށާއި އާއްމު މިނިވަން ރައްޔިތުން ހިމާޔަތްކޮށްދިނުމަށް ތަފާތު މިނިސްޓުރީތަކެއް އުފައްދައި ގާނޫނު އަސާސީއިން ރައީސުލްޖުމުހުރީއްޔާއަށް ލާޒިމުކުރެވިފައިވާކަންވެސް އެއީ ދިވެހިން ދަންނަ ވާހަކައެކެވެ. ގާނޫނީ ވާޖިބު އަދާކުރުމަށް މުއައްސަސާތައް ގާއިމުކޮށް އެމީހުންނަށް ހަތިޔާރު ހަވާލުކޮށްފައިވާއިރުވެސް ފުލުހުން ގޮވާލަނީ އާއްމުން ހޭލުންތެރިވުމަށެވެ. އަދި ދުވާލުގައި ވައްކަންކޮށްއުޅޭ މީހުންނަށް އާއްމުން ސަމާލުވުމަށެވެ. މާނައަކީ ޖަންގަލީގައި މިނިކާވަގު އުޅޭނެއޭ ދުވާލުވެސް އަދި ރޭގަނޑުވެސް އެސޮރުމެން ތިބޭނީ ދޫކޮށްލާފައޭ އެހެންކަމުން ހަތިޔާރު ނެތަސް އެސޮރުމެންނަށް ބަލައިގެން ޖަންގަލީގައި އުޅޭށެވެ. މިއީ 6 އަހަރުގެ ކުއްޖަކަށްވެސް ބުނެދެވޭނެ ވާހަކައެކެވެ. އާއްމުގޮތެއްގައި ޖަންގަލީއެއްގައި ގާނޫނެއް ނުއޮންނާނެއެވެ. ރަނގަޅު ވާހަކައެކެވެ. އެންމެ ބާރުގަދަ އެންމެ ވަގު މިނިކާވަގު އައިސް މީހަކު ކާލިޔަސް ދެންކުރާނެ އެއްވެސް ކަމެއް ނޯންނާނެއެވެ. އަދި ދެން ތިބޭ ކުދިކުދި ބާރެއްނެތް ޖަނަވަރާއި ދޫނި ސޫފާސޫފިތައް ކާލިޔަސް ދެން ކުރާނެ ކަމެއް ބެލޭނެ ގޮތެއް ނޮއޮންނާނެއެވެ. ފެންނާނީ ކާލާފައި އޮންނަތަން ނުވަތަ ގެއްލޭތަނެވެ. ނަމަވެސް ބޭރުގައުމުތަކުގައި މިފަދަ ކަންކަމުންވެސް އެގައުމުތަކުގެ ރައްޔިތުންނަށް ބަދަލުހޯދައިދެވެއެވެ. އަދި ރައްޔިތުން ރައްކާކޮށްދެއެވެ. އެއީވެސް ގާނޫނުތަކާއި ގަވާއިދުތަކުންނެވެ. ޒިންމާނަގާނެ ބަޔަކު ތިބެއެވެ. އެއީ މިކާވަގު ބަލަހައްޓާމީހުން ތިބޭނެއެވެ. ޖަންގަލިވެސް ބަލަހައްޓާމީހުން ތިބޭނެއެވެ. ގަވާއިދު އޮންނާނީ ހަދާފައެވެ. އަދި މިނިކާވަގު ނުބެލެހެއްޓިގެންގޮސް ރައްޔިތަކަށް ކަމެއްވެއްޖެޔާމު އެމިނިކާވަގު ބަލަހައްޓާމީހާއަށް ހުކުމްއާދެއެވެ. ޖޫރިމަނާކުރެއެވެ. އަދި ބައެއް ފަހަރު ހޯމު މިނިސްޓަރު އިސްތިއުފާވެސް ދެއްވައެވެ. ރައްޔިތުންގެ ކިބައިން މައާފަށް އެދޭތަންވެސް ފެނެއެވެ.

ނަމަވެސް ރާއްޖޭގެ ރައްޔިތުން ބަލަހައްޓަން ތިބޭ އެކިވަރުވަރުގެ ސިޔާސީ ލީޑަރުންނާއި މިނިސްޓަރުންނާއި މީސްމީހުން ދައުލަތުގެ މުސާރަލިބިގެން ރައްޔިތުންދޭ މަގާމެއްގައި ހުރެ މަންފާލިބި އެމީހުންގެ އާއިލާގެ ދިރިއުޅުން ކުރިއަށް ގެންދާއިރުވެސް އެމީހުންނަށް ދިވެހިން ރައްކާތެރިކޮށެއް ނުދެވެއެވެ. އަދި ޖަވާބުދާރީކޮށެއްވެސް ނެދެވެއެވެ. ނުކޮށްދެވޭތާގައި އެމީހުންގެ ވެރިޔާ ރައީސުލްޖުމުހޫރިއްޔާ ދުވަހަކުވެސް މީހަކު ވަކިކޮށްފައި ނުވޭ ދިވެހިންނަށް އަޅާނުލައިގެން ގާނޫނަށް އަމަލުނުކޮށްގެން އަދި ދައުލަތުން ޒިންމާނަގަންޖެހޭ މީހަކު ޒިންމާ ނުގެނުމުގެ ސަބަބުން ދިވެއްސަކަށް ލިބޭ ގެއްލުމެއްގެ ބަދަލެއް ހޯދައެއް ނުދެއެވެ. އެހެންކަމުން 12 އަހަރަށް ޖަލަށްލުމަށް ހުކުމް ކޮށްފައިހުރި މއ އާފަލުގޭ މުހައްމަދު މުޖުތަބާ ކޮށްފައިވާ ހުރިހާ ވައްކަމަކުން ދިވެހިންނަށް ލިބުނުގެއްލުމާއި އާއްމުން އެތަކެއް ދުވަހު އުޅުނު ބިރުވެރިކަމުގެ ޒިންމާ ފުލުހުން ނުވަތަ ކަމާބެހޭ ފަރާތަކުން ނަގަންޖެހެއެވެ. އަދި ޗީފް އޮފް ސްޓާފް ރައީސުލްޖުމްހޫރިއްޔާ މުހައްމަދު ނަޝީދުއަށް ގޮވާލަން ބޭނުންވަނީ މިހާރުން މިހާރަށް ދޫވެފައިތިބި ކުށްވެރިން ހައްޔަރުކުރުމަށެވެ. އަދި އެމީހުންނަށް މާފުދެއްވުމުގައި ހަމަޖެހިފައިވާ ގަވާއިދަށް ބައްލަވައި އެމަގުން ނޫނީ އެއްވެސް މީހަކަށް މާފު ނުދެއްވުމަށެވެ. އަދި މިފަދަ ބަޔަކު ދޫވެފައި ތިބިއްޔާމު އެފަދަ ބަޔެއްގެ ވޯންޓަޑް ލިސްޓެއް ހަދައި ރާއްޖޭގެ ހުރިހާ ދޯނިފަހަރަކަށާއި އޮފީސްތަކަކަށާއި އަދި ކަމާބެހޭ ފަރާތްތަކަށް ފޮނުވުމަށެވެ. މީގެ އިތުރުން އޮޑިދޯނިފަހަރުން އެއްރަށުން އަނެއްރަށަށް ދަތުރުކުރާމީހުންގެ ލިސްޓެއް ބެލެހެއްޓުމަށް އަމުރުކޮށް ކުށްވެރިން މޮނީޓާކުރެވޭނެ ނިޒާމެއް ގާއިމުކޮށް އެމީހުން އާއްމުންނާ އެއްކައިރި ހިސާބަކަށް ގެންދިޔުމަށެވެ. އަދި މިފަދަ ކަންކަމުން ރައްޔިތުން ކުރިމަތިލާ ވޭންތަކާއި ނުރައްކާތެރިކަންބަލައި ރައްޔިތުންގެ ކިބައިން މައާފަށް އެދުމަށެވެ."

މަތީގައި އެވާ ލިޔުންކޮޅަކީ އާއްމުންގެ މީހަކު ހަވީރު ނޫހުގައި ޖަހާފައިވާ އިބާރާތްކޮޅެކެވެ. އަހަރެމެންގެ ހިތަށްއަރާ ދިވެހިންނަށް ޖެހިފައިވާ ބޮޑެތި މުސީބާތްތައް ހައްލުކުރުމަށް މިއަދުގެ ސަރުކާރުން ކިހާ ސަމާލުކަމެއް ދޭބާވައެވެ؟ ކުރީގެ ސަރުކާރުތަކުން ޒިންމާ ނުނަގާ ވާހަކަދައްކާއިރު މިއަދުގެ ސަރުކާރުން ވަކިން އެކަންކަމުގެ ޒިންމާނަގާބާވައެވެ؟ އަހަރެން އާވެރިޔަކު އާސަރުކާރެއް ގެނެސްގެން މިއަދު ބަދަލުވެފައިވަނީ ކޮންކަމެއްތޯއެވެ؟ ރައީސް ނަޝީދާއި އޭނާގެ އައުވާނުން ބޮޑު މުސާރަނަގައިގެން ރައްޔިތުންނަށް ބޭނުންވާ ރައްކާތެރިކަން ހޯދައިދެވޭބާވައެވެ؟ ފުލުހުން އެކިވަރުވަރުގެ ކުށްވެރިން އަތުލާގަންނާއިރު އެމީހުންނާމެދު ދައުވާކުރުން ލަސްވެ ނުވަތަ ކުރާ ދައުވާގައި އޮއްޓަރު ނުހުރުމުގެ ސަބަބުން އެތަކެއް ބަޔަކު ދޫވެގެންދާއިރުވެސް ޕީޖީ އަހުމަދު މުއިއްޒުމެން މަގާމުގައި މުސާރަ ނަގާލަނަގާލަ ތިބެނީ ކީއްވެބާވައެވެ؟ މައްސަލަ ކޯޓަށް ސާބިތުނުވީއޭ ނުވަތަ އެކަމާބެހޭ ގާނޫނެއް ނެތޭ ފަޑިޔާރުން ބުނާއިރު އެފަދަ ގާނޫނުތައް ނަހަދައި މަޖިލީހުގެ މެމްބަރުން މުސާރަ ނަގާލަނަގާލަ ތިބުމުގެ ބޭނުމަކީ ކޮބައިތޯއެވެ؟ އިސްލާމީ ޝަރީއާއަކީ ގާނޫނު އަސާސީގެ މަސްދަރުކަމަށް ގާނޫނު އަސާސީގައި ބުނެފައިވާއިރު ގާނޫނެއްނެތޭ ބުނެ ފަޑިޔާރުން ބޮޑެތި ކުށްވެރިން އާއްމުންގެ ތެރެއަށް ދޫކޮށްލަނީ ތިމާގެ މޮޅުކަން ދެއްކުމަށް ހެއްޔެވެ؟ ކުށްވެރިން ޖަލުގައި ނުބޭއްތިބިގެން އުޅެނީ ކީއްވެގެންކަން ހޯމު މިނިސްޓަރު ޝިހާބަށް ނުބުނެދެވެނީ ކީއްވެގެންހެއްޔެވެ؟ ޝިހާބުއަށް ތިމާގެ މަސްއޫލިއްޔަތު ނުއުފުލެއްޔާމު އިސްތިއުފާދެއްވައި ރައްޔިތުންގެ ކިބައިން މައާފަށް އެދޭކަށް ނުވޭހެއްޔެވެ؟ ޝިހާބަކީ އަމިއްލައަށް އިސްތިއުފާދޭން ކެރޭވަރުގެ މީހަކަށްނުވާއިރު، އޭނާ މަގާމުން ވަކިކޮށް އެކަން ކުރެވޭނެ މީހަކާ އެމަގާމު ހަވާލުކުރަން ރައީސް ނަޝީދު ބޭނުންފުޅު ނުވަނީ ކީއްވެބާވައެވެ؟

މިހަބަރާގުޅޭ އިތުރު ތަފުސީލު ހަވީރު ނޫހުން

ޒުވާނަކު މަރާލައިފި - ފުރޮޒިކިޔުޓަ ޖެނެރަލް ޒިންމާނަގަންޖެހޭނެ

ރޭއިރާކޮޅު 6 މީހަކަށް ހަމަލާދީ، އެކަކު މަރާލައިފިއެވެ. އެކަމެއް ހިނގީ ޒުވާނުންގެ މަރުކަޒާ އިންވެގެން އޮންނަ ދަނޑާކައިރީގައެވެ. މިފަހަރު މިހަމަލާ ހިންގި މީހުންނަކީ މިފަދަ މާރާމާރީއެއްގެ މައްސަލާގައި ތަހުގީގުކުރެވި، އެމީހުންގެ މައްސަލަ ޕޮރޮޒިކިޔުޓަ ޖެނެރަލްގެ އޮފީހަށް ހުށައެޅިފައި ތިބި ބަޔެކެވެ. ބޮޑު މުސާރަ ނަންގަވާ އަހުމަދު މުއިއްޒު ކޮބާތޯއެވެ؟ މައްސަލަތައް ފުނިޖެހި، ސަރީއަތަށް ހުށަނޭޅި، އެއްބަޔަކު މަރުވެ، އަނެއްބަޔެއްގެ ހައްގު ގެއްލިދާއިރުވެސް،މުސާރަ ބަރާބަރަށް ނަންގަވަމުހެއްޔެވެ؟

މިއީ މިފަދަ އެއްމެ މައްސަލައެއް ނޫނެވެ. މީގެ އެތަކެއް ކަމެއް ހިނގާފިއެވެ. އަދިވެސް، ހުސެން ސަމީމާއި އަހުމަދު މުއިއްޒުމެން ތިޔަ މަސައްކަތްކުރެވޭނެ ބަޔަކަށް ފުރުސަތުދިނުމަށްޓަކައި ގެއަށް ވަޑައިގަންނަވާކަށްނުވޭހެއްޔެވެ؟ ޕީޖީ އޮފީހުގައިވެސް ވެބުސައިޓެއް ހުރެޔޯލައެވެ. އެއްވެސް މައުލޫމާތެއް އެއިން އާއްމުންނަށް ނުލިބޭ، އާއްމުންނަށް އެއްވެސް ގޮތަކުން ބޭނުމެއް ނުހިފޭ، ކޮންމެވެސް ބަޔަކަށް ލާރިގަނޑެއް ދޭން ކޮންފައި ހުރިކަމެއްކަމަށް ފެނެއެވެ. ދެތިން ޕީޑީއެފް ނޫނީ ނެތެވެ.

މިހާދިސާއާ ގުޅޭ އިތުރު ހަބަރު ހަވީރު ނޫހުން

!އާނިޔާ އިންސާނީ ހައްގުތައް ރައްކާތެރިކުރުމަށް

ދާދިފަހުން ރައީސް ނަސީދުވަނީ ހިއުމަންރައިޓްސް ކޮމިސަނަށް ހޮވަން ފެންނަ މީހުންގެ ލިސްޓެއް ރައްޔިތުންގެ މަޖިލީހަށް ފޮނުވާފައެވެ. އޭގެ ތެރޭގައި ހިމެނޭ އެކަކީ ރައީސް ނަސީދާއި އާއިލީގޮތުން ގުޅުންހުރި އައިސަތު އާނިޔާއެވެ. ދެބެންގެ ދެދަރި ކަންނޭގެއެވެ. މީނާ މިކަމަށް ކުފޫ ހަމަވަނީ އިސްލާމުދީނަށް ފުރައްސާރަކޮށް މިނިވަން ނޫހުގައި ދިވެހިބަހުން ލިޔެ، އޭގެ ފަހުންވެސް މިނިވަން ނިއުސްގައި އިގިރޭސިބަހުން ލިޔަމުން އަންނާތީތޯ ސުވާލުއުފެދެއެވެ. މީނާއަކީ މުސްލިމު އަންހެނުން ބުރުގާ އެޅުމާ ކަނޑައެޅިގެން ދެކޮޅުހަދާ، އެކަމަށް ފާޅުގައި ގޮވާލަމުން އަންނަ އިލްމާނީ ވިސްނުމުގެ އަންހެނެއްކަން އޭނާ ދަންނަ ކޮންމެ މީހަކުމެ ދަންނާނެއެވެ. އޭގެ ތެރޭގައި ރައީސް ނަސީދުވެސް ހިމެނޭނެކަން ކަށަވަރެވެ.

މިފަދަ މީހަކު އެކޮމިސަނުގައި ހިމެނުމުންވާނެ ގޮތަކީ، 1. ދިވެހި މުސްލިމު އަންހެނުންގެ ތެރެއިން ބުރުގާ އަޅައިގެން ތިބިމީހުން ބުރުގާ ބޭލުމަށްޓަކައި އިންސާނީ ހައްގުގެ ނަމުގައި ކޮމިސަން މެދުވެރިކޮށް މަސައްކަތްކުރުމާއި، 2. ބުރުގާ އެޅުމުގެ ސަބަބުން ރާއްޖޭގެ ދިވެހި އަންހެނުންގެ އިންސާނީ ހައްގު ގެއްލިފައިވާކަމަށް ކޮމިސަނުގެ ނަމުގައި ބޭރު ފަރާތްތަކަށް އަމާޒުކޮށް ރިޕޯޓުނެރެގެން، ސަރުކާރަށް ފާޑުފާޑުގެ ޕުރެސަރުކުރުވުމާއި 3. އަގީދާ ބަލިކަށިވުމުގެ ސަބަބުން މުރުތައްދުވާ މީހުންގެ ހިމާޔަތުގައި ކޮމިސަނުން ތެދުވުމާއި 4. އެމީހުންގެ މުރުތައްދުކަމުގައި ހައްދުފަހަނައަޅައިދިޔުމަށް ކޮމިސަނުގެ ނަމުގައި ހިތްވަރުދިނުމާއެކު އެކަމަކަށް މަގުފަހިކޮށްދިނުމާއި 4. ކޮމިސަނާއި ދީނީ ޖަމުއްޔާތަކާ ޖެއްސުމާއި، މިހެންގޮސް މިހާރު ނުވެހުރި ހުރިހާ ކަމެއް ކުރާނެއެވެ.

އޭގެ ސާފު ހެއްކަކީ މިހާރުވެސް މީނާއަކީ ފޭސްބުކުގެ އިތުރުން ބުލޮގެއްގައި "ރެހެންދި" ގުރޫޕެއް ހަދައިގެން، ތިމާ އަމިއްލައަށް ފޮރުވިގެން، އަންހެނުންގެ ހައްގުތައް ރައްކާތެރިކުރުމުގެ ނަމުގައި ދީނަށް ފުރައްސާރަކުރަމުން އުޅޭ އަންހެނެކެވެ. ރެހެންދި ގުރޫޕުގެ މޭސްތިރިންނަކީ މީނާގެ އިތުރުން ވެލެޒިނީ އާއި ސޫސަން އިބުރާހިމް ފުޅެވެ. ރެހެންދީ ގުރޫޕުގެ ވާގިވެރިންނަކީ ބުރުގާ ދެކެ ނަފުރަތުކުރާ އަންހެނުންނާއި، އެއް ޖިންސުގެ ގުޅުމަށް އިއްވަރުދޭ ފިރިހެނުންނާއި، ދީނުންބޭރުވެފައި ތިބި ފާސިގުންނެވެ.

ރެހެންދި ގުރޫޕުގެ ތައާރަފުގައި ތިމަންމެންނަކީ ގުރުއާނާއި ސުންނަތާ ދެކޮޅުވެރިބަޔެއް ނޫނޭ ލިޔެގެން އުޅެނީ ދިވެހި މުސްލިމުން މިމީހުންގެ ތެރެއަށް ގެނެސްގެން އެމީހުންވެސް މަގުފުރެއްދޭތޯއެވެ. އެމީހުންގެ ބުލޮގު ބަލާލުމުން ބުރުގާއާ ދެކޮޅު ވަރަށް ގިނަ ލިޔުންތައް ފެންނާނެއެވެ. އަދި ބުރުގާއަކީ ކޮންމެހެން އަޅަންޖެހޭ އެއްޗެއްނޫނޭ ބުނެ މީހުންނަށް ވިސްނައިދިނުމަށް، ތިމާމެންނަކީ ދީންވެރި އަންހެނުންނޭ ބުނެ އެހެން މީހުން މަގުފުރައްދަން ލިޔެފައި ހުންނަ ލިޔުންތައް ހުންނާނެއެވެ. އެމީހުންނަށް ނޭގޭ ކަމަކީ ދީންވެރި އަންހެނުން ތިބޭނީ ރަސޫލާގެ އަބިކަބަލުންނާއި ދަރިކަބަލުން ފަދައިން ބުރުގާއިން ބޮލާއި ކަރުވަޅުތައް ނިވާކޮށްގެންކަމެވެ. ނަސާރާދީނުގައި އަޅުވެރި އަންހެނުން (ނަނުން) ތިބެނީވެސް އެހެންނޫންހެއްޔެވެ؟ އިސްލާމުދީނުގައި ހިލާފު އުފެދޭ މައްސަލައަކީ މޫނު ބުރުގަލެވެ. ނޫނީ ނިގާބެވެ. ބުރުގާ އެޅުމަކީ ގުރުއާނާއި ސުންނަތުގެ ނަސްލުން ވަރަށް ސާފު މައްސަލައެކެވެ.

ޔާމީނު ބަތަލަކަށް ހަދަން ރައީސް ނަސީދު މަސައްކަތްކުރުން: އެއްވަނަ ބައި

ޔާމީނަކީ ކުރިން އަބުދުއްލާ ޔާމީނެވެ. ފަހުން، ރައީސްކަމަށް ފައިނަގަންވެގެން، ތިމާގެ ނަން އަމިއްލައަށް ބަދަލުކުރީ ޔާމީން އަބްދުލްގައްޔޫމަށެވެ. ކުރީގެ ރައީސް މައުމޫނުގެ ނަމާ އެއްގޮތްކޮށް، ރައްޔިތުންގެ ރުހުން ލިބޭތޯއެވެ. ނޫނީ މައުމޫނު ފަދަ ސަހުސިއްޔަތަކަށްވެވޭތޯއެވެ. އިއްލަބޭ ވެރިކަމަށް އަންނަންވެގެން ސިހުރުހެދި ހިސާބުންފެށިގެން، މައުމޫނު އެންމެ ބޮޑަށް އިތުބާރުކުރާ މީހަކަށް ޔާމީނުވިއެވެ. އޭގެ ކުރިން ޔާމީނަކީ މީހަކު ދަންނަމީހެއްނޫނެވެ. އިއްލަބޭ އެހެލާފައި ހުރި ދުވަސްވަރުގައި ޔާމީނަށް ވަޒީރުކަމާއި ސަރުކާރުގެ އެތަކެއް ކުންފުނީގެ ޗެއާމަންކަން ދިނެވެ. އޭގެ ތެރޭގައި އެސްޓީއޯ، ސުޓެލްކޯ، މިފްކޯ ހިމެނެއެވެ. ޓުރޭޑް ނުވަތަ ވިޔާފާރީގެ މިނިސްޓަރުކަން ކޮއްފައިވެއެވެ. އެއްވެސް ތަނެއް، ތަރައްގީވެ، ކުރިއަރާފައެއް ނުވެއެވެ.

ވީހާވެސްކަމަކީ ތިމާއާ ގާތް ރައްޓެހި ރަހުމަތްތެރިން މުއްސަދިވީއެވެ. އޭގެ ތެރޭގައި ސަންޓުރެވަލް ސިޔާމު، ލޮލީ ޖާބިރު، ޖައުސާ ޖައުފަރު، ޖަންގިޔާ ނާޒިމުފަދަ މީހުން ހިމެނެއެވެ.

ސިޔާސީ އޮއިވަރުގެ ތެރޭގައި ލޮލީ ޖާބިރުއަކީ ތޮށި ބަދަލުކުރަމުން ދުވާ ފިނިހަކައެކެވެ. ފުރަތަމަ، ޔާމީނާއެކު ޑިއާރުޕީ އުފައްދައި ހިންގީއެވެ. ދެން، މައުމޫނު ބިޔާދޫ ރިސޯޓު ޖާބިރަށް ނުދީދާނެހެން ހީވީމާ، ޑީއާރުޕީ ދޫކޮށް، ޔާމީނާއެކު ޕީޕަލް އެލަޔަންސް ޕާޓީހެދީއެވެ. އެއަށްފަހު، ބުރުމާ ގާސިމު ވެރިކަމަށް ފައިނަގައި، ރައްޔިތުންނަށްވީ އިހުސާސްތެރިކަމުގެ ލޯބީގައި ވެރިކަމަށް ހޮވައިދާނެހެން ހީވީމާ، ބުރުމާ ގާސިމުގެ ޕާޓީ ޖުމުހުރީ ޕާޓީއާ ގުޅުނީއެވެ. ދެން، އަންނި ވެރިކަމަށް އައިސް، ރައްޔިތުންގެ ޓޫރިޒަމް ކުންފުންޏާ މައްސަލަޖެހި އޭގެން ސަލާމަތް ނުވެވުނީމާ، އެމްޑީޕީއަށްވަދެ ސަރުކާރުގެ ތެރެއިން އެމައްސަލައަށް ހައްލެއް ހޯދީއެވެ. އަދި މިފްކޯ ތިޖޫރިން ހޯދި ވަގު ޑޮލަރު މައްސަލައަށް ފަސްއެޅީއެވެ.

މައުމޫނުގެ ވެރިކަން ނިމި، ޔާމީނަށް ވެރިކަމަށް އާދެވިދާނެކަމަށް ހީނުވާތީވެ، ސަންޓުރެވަލް ސިޔާމު ބެލީ ޑިއާރުޕީގެ ނައިބު ޒައީމުކަމުން އިސްތިއުފާދީ، އެއްވެސް ޕާޓީއަކަށް ނުވަދެ، ކޮޅުމަތި ބަލަން ހުންނާށެވެ. ގާނޫނު އަސާސީ އިސްލާހުކުރި ދުވަސްވަރު، މަޖިލީހުގެ ހާޒިރީއިން ފަހަތުން އެއްވަނައަށް ހޮވިފައިވަނީ މިސިޔާމެވެ. މެމްބަރަކަށްވެހުރެ، މަޖިލީހުގެ ޖަލުސާތަކަށް ނުގޮސް، އަމިއްލަ ވިޔަފާރިއާއި އުފަލާ އަރާމު ދަތުރުތަކުގައި ރާއްޖޭން ބޭރުގައި އުދުހި، ރައްޔިތުންގެ ހައްގަށް ހަރާންކޯރުވެފައިވެއެވެ. ނަމަވެސް، އަނެއްކާވެސް ތިމާގެ ލަދުހަޔާތުގެ ކަންފުޅެއް ނުހުންނަކަމުން، އަނެއްކާވެސް ދާލު އަތޮޅަށް ކުރިމަތިލީއެވެ. ދާލު އަތޮޅުގައި މީނާގެ ރިސޯޓެއް އޮންނަކަމުން، މާއްދިއްޔަތުގެ ދަޅަ އެއަތޮޅު ރައްޔިތުންނަށް ދައްކުވައި ދާލު އަތޮޅުގެ ގޮނޑިއަށް އަނެއްކާވެސް ސަވާރުވީއެވެ. ރިސޯޓު އޮންނަ އަތޮޅުތަކުގެ ރައްޔިތުންނަކީ އެރިސޯޓުތަކުގެ ވެރިންގެ އަޅުންފަދަ ބަޔެކެވެ. މިކަމަކީ ލާމަރުކާޒީ ބިލު ހަދަމުންދާ ދުވަސްވަރު ވިސްނަންޖެހޭ ވަރަށް ނާޒުކު މައްސަލައެކެވެ. މަޖީލިހު މެމްބަރަކަށްވާން ސިޔާމު ބޭނުންވަނީ މަޖީލީހު މެމްބަރުންނަށް ލިބޭ އިނާޔާތްތަކާއި އިމްތިޔާޒާއި އިއްޒަތުގެ ބޭނުމުގައެވެ.

މިހާރު ޔާމީނުގެ ވާގިވެރިންނަކީ ޖައުސާ ޖައުފަރާއި ޖަންގިޔާ ނާޒިމެވެ. ޖައުސާ ޖައުފަރު މަޖިލީހުގެ ގޮނޑިއަށްކުރިމަތިލައި، ރައްޔިތުން އެއްލާލުމުން، ސިޔާސީ މައިދާނާ ދުރުގައި ކުޅިބަލަން މަޑުކޮށްލީއެވެ. ނާޒިމަކީ މީމު އަތޮޅު ރައްޔިތުން އަޅުވެތިކޮށްގެން އުޅޭ، ކަރަޕްސަނުން ފެންވަރައިގެން މުއްސަދިވެފައިހުރި މަހުޖަނެކެވެ. ނާޒިމުގެ އެހީތެރިކަމާއެކު ކުރިން މީމު އަތޮޅު ގޮޑިއަށް ނަސްރީނާއަށްވުރެންބޮޑަށް މައުމޫނު ދެކެ ލޯބިވާ އަނީސާ އަހުމަދު މަޖިލީހުގެ ގޮނޑިއަށް ހޮވާދީފައިވެއެވެ. މިފަހަރު، މައުމޫނުގެ ވެރިކަން ނިމުމާއެކު ޔާމީނު ނޫނު އަތޮޅު ގޮނޑިއަށް ނުހޮވާނެކަން ޔަގީންވުމުން، ނާޒިމުގެ އެހީތެރިކަމާއެކު މުލަކު ދާއީރާގެ ގޮނޑިއަށް ޔާމީނު ސަވާރުވީއެވެ. ނާޒިމު ބުނެފިނަމަ، ބުޅަލެއްވެސް އެގޮނޑީގައި މުލަކު ރައްޔިތުން ބައިންދާނެ ބީދައިންނެވެ. ނޫނު އަތޮޅަކީ ޔާމީނު މަންމަ އުފަންރަށް ވެލިދޫ ހިމެނޭ އަތޮޅެވެ. ނަމަވެސް، މުލަކު އަތޮޅާ ޔާމީނާ ވާކަމެއްނެތެވެ.

ޑރ. މުސްތަފާ ލުތުފީގެ ނާގާބިލުކަން އަނެއްކާވެސް ފަޅާއަރައިފި!

ދިވެހިރާއްޖޭގެ އިންސާނީ ހައްގުތަކާބެހޭ ކަމިސަނުން ތުރުކީގެ މެނޭޖުމަންޓުން ހިންގާ ލާލޭ އިންޓަނޭސަނަލް ސުކޫލުން ދަރިވަރުންނާމެދު ނޭއްގާނީ އަމަލުތައް ހިންގާކަމަށް ބުނެ ދާދި ފަހުން ރިޕޯޓެއް ނެރެފިއެވެ. އޭގައި ފާހަގަކޮށްފައިވާ އެއް މައްސަލައަކީ ސުކޫލުތައް ޕުރައިވަޓައިޒުކުރަނީއޭ ގޮވަމުން ޑރ. މުސްތަފާ ލުތުފީ ގޮވަމުންދިޔައިރު، އެކަމާބެހޭ އެއްވެސް ގަވާއިދެއް އުސޫލެއް އެޑިޔުކޭސަނުން އެކުލަވާލައިފައިނުވާކަމެކެވެ. ޑރ. މުސްތަފާ ކަހަލަ ނާގާބިލު މީހުން މިނިސްޓަރުންނަށްލީމައި އޭގެ ހުރިހާ ދެރައެއް ދިވެހި ކިޔަވާކުދިންނަށެވެ. ދިވެހި ކިޔަވާކުދިން ބެލުޓުން ތަޅާމަރާއިރުވެސް، އެކަން އެޑިޔުކޭސަނުން ބެލިފައެއްނެތެވެ. ބޭރުބަޔަކާ ސުކޫލު ހަވާލުކޮށްގެން ހެވިފައި އެތިބީނުންހެއްޔެވެ. މިއޮއްހައި ދުވަހު ލާލޭ ސުކޫލުން ސުކޫލު ބޯޑު ނަހަދައި އުޅޭއިރުވެސް އެޑިޔުކޭސަނަށް އެގޭކަމަކަށް ނުވެއެވެ.

އޭބަލަ ލުތުފީބޭއެވެ. އެހެންމީހުން ސުކޫލުތައް ޕުރަވަޓައިޒުކުރުމުގެ ކުރިން އެވެރިން އެތަންތަން ހިންގަންވާނެގޮތުގެ އުސޫލުތަކާ ގަވާއިދުތައް ހަދާނެއެވެ. އަދި އެކަންކަން އެޑިޔުކޭސަނުން ބެލޭނެ ނިޒާމު ހަމަޖައްސައެވެ. އަދި އެޑިޔުކޭސަނުން ހަދާ ގަވާއިދުތަކާ އެއްގޮތަށްތޯ ސުކޫލު ހިންގަނީ ބަލާ ފިޔަވަޅުވެސް އަޅާނެއެވެ. މިބެޔަށް މިނިސްޓަރުކަންދޭން ހެޔޮވާނެހެއްޔެވެ؟

އޭބަލަ ލުތުފީބޭއެވެ. މަތީ ސާނަވީގައި ދިވެހި އިސްލާމަށް ޖެހިގެން އުޅޭ މައްސަލަ އެގޭހެއްޔެވެ؟ އެދެމާއްދާގެ މުގައްރަރު ވަޅޯފެންކަމުން ކުދިން ކިޔަވާ ހިތްނުވަނީއެވެ. ކުދިން ކިޔަވާ ހިތްނުވާތީއޭ ކިޔާފައި އެދެމާއްދާ ދޫކޮށްލުމުގެ ފުރުސަތު ހުޅުވާލަންވީއެއްނޫނެވެ. އެދެމާއްދާގެ މުގައްރަރު އިސްލާހުކޮށް ދަރިވަރުން ސައުގުވެރިވާނެގޮތަކަށް ހަދަންވީއެވެ. ދިވެހި ޑިގުރީގެ ބައިތަކެއް ސާނަވީ ދިވެހި މާއްދާގައި ހިމެނިދާނެއެވެ. އަދި ކޮންޕުރޭޓިވު ރިލިޖަން އިސްލާމު މާއްދާގެ ބައެއްގެ ގޮތުގައި ހިމެނިދާނެއެވެ. އެއިރުން ދަރިވަރުން ސައުގުވެރިނުވެއެއް ނުދާނެއެވެ. ނޫނޭވާ ލުތުފީބޭ ނަގައިގެން ތިޔައުޅޭ ފީއެޗްޑީއަށް އަވަރިންގެ ސަލާން.